Adamzat tarıhyndaǵy eń úlken zymyran Starship synaq ushyrylymyn ótkizdi
ASTANA. KAZINFORM — SpaceX kompanııasy óziniń eń úlken Starship V3 zymyranynyń 12-shi synaq ushyrylymyn ekinshi áreketimen aıaqtady. Ol Úndi muhıtyna sátti qondy, dep habarlaıdy DW aqparat agenttigi.
Eń úlken Starship zymyrany — Starship V3 dep atalatyn jańa býyn úlkeıtilgen prototıpteriniń birinshisi 23 mamyr, senbi kúni túnde salystyrmaly túrde sátti synaq ushyrylymyn ótkizdi. Onyń Tehastaǵy Ilon Mask ıeligindegi SpaceX kompanııasynyń ushyrý alańynan ushyrylýy X áleýmettik jelisinde tikeleı efırde kórsetildi.
Starship V3 zymyran júıesi sol kezde alty qozǵaltqyshynyń birinsiz jumys istegenine qaramastan tik kúıge keltirilip, ǵaryshta shamamen bir saǵat ótkizip, sodan keıin Úndi muhıtyna qona aldy. Buǵan deıin ǵarysh apparaty Super Heavy údetkishinen ajyraǵannan keıin ǵaryshta ınertsııa boıynsha qozǵalǵan edi.
Bul Starship baǵdarlamasy aıasynda 2025 jyldyń qazan aıynan beri alǵashqy synaq ushyrylymy boldy. Osyndaı zymyran júıesi alǵash ret 2023 jyldyń sáýirinde synaldy — sol kezde birneshe mınýttan soń tolyǵymen jaryldy.
Osyǵan deıin Tehastaǵy Starbase ǵarysh aılaǵynan beısenbi, 21 mamyrda ótýi tıis bolǵan ushyrylymǵa deıingi 90-mınýttyq keri sanaq birneshe ret toqtatylǵanyn jazdyq.
