Adamdardy jıhadqa shaqyrǵan aqtóbelik bes jylǵa sottaldy

ASTANA. QazAqparat - Aqtóbe turǵyny Amanqos Erbolatov «VKontakte» áleýmettik jelisinde jıHad jasaýǵa shaqyrǵan aýdıojazba taratqany úshin jalpy rejimdegi kolonııada 5 jylyn ótkizetin boldy, dep jazdy aktobetimes.kz.

Sottalýshynyń ákesi uly 24 jasta ekenin, taıaýda ǵana otaý qurǵanyn aıtty. Amanqos bala kezinen gandbolmen aınalysqan, sport sheberi ataǵyn alǵan. «Qazhrom» komandasynda gandbol boıynsha bapkerdiń kómekshisi bolyp jumys istegen.

«Bapkerdiń kómekshisi retinde oǵan  óte az, aıyna 20 myń teńge tóledi. Bapkerlikpen qosa dánekerleýshi jumysyn atqardy, jazda jumys kóp bolsa, qysta azaıatyn», - dedi ákesi.

Erbolatov uıaly telefon saýdasymen aınalysqan. Namaz oqyǵan. Ol Internetten radıkaldyq baǵyttaǵy aýdıojazba júktep alyp, ony «VKontakte» jelisine jarııalaǵan.

Amanqos otbasynda jalǵyz ul. Narkologııalyq jáne psıhonevrologııalyq dıspanserde esepte turǵan joq. Buryn sottalmaǵan. Úkim shyǵar aldynda sottalýshy bar kinásin moıyndady, jazasyn jeńildetýdi surady.

28 qyrkúıekte ony ustap, «dinı alaýyzdyq týdyryp», terrorızmge shaqyrǵany úshin tutqyndady. Prokýror ony múlkin tárkileı otyryp, 6 jyl  6 aıǵa sottaýdy usyndy, alaıda aqtóbelik 5 jylǵa sottaldy. Ol jazasyn jalpy rejimdegi kolonııada óteıdi.