Adam júregi ǵaryshta jyldam qartaıady

ASTANA. KAZINFORM – AQSh-ta bir top ǵalymdar júrgizgen zertteý adamnyń júregi ǵaryshta bar bolǵany bir aıdan keıin qartaıý belgilerin kórsete bastaǵanyn málimdedi, dep jazady Anadoly.

Eksperıment júrgizý úshin amerıkandyq ǵalymdar shynaıy júrektiń jıyrylýyna uqsas jasandy júrek tinin jasap, ony arnaıy «júrek-chıp» júıesine ornalastyrdy. Bul júıe nóldik gravıtatsııa jaǵdaıyndaǵy ózgeristerdi baqylaý úshin Halyqaralyq ǵarysh stantsııasyna (HǴS) 30 kúnge jiberildi.

Zertteýshiler naqty ýaqyt rejıminde baqylaý úshin sensorlardan paıdalandy. Salystyrý úshin, Jerde de dál sondaı zertteýler júrgizilgen. Onyń barysynda ǵalymdar HǴS-ta 12 kúnnen keıin júrek tininiń jıyrylý kúshi eki esege derlik tómendegenin, al Jerde uqsas tinderdiń turaqty bolǵanyn anyqtady. Bulshyqet álsizdigi Jerge oralǵannan keıin 9 kún boıy saqtaldy.

Osylaısha, ǵaryshta bar bolǵany bir aı ishinde adamdardyń júrek tinderi álsirep, júrek soǵý yrǵaǵy buzylyp, qartaıý belgilerine uqsaıtyn molekýlıarlyq jáne genetıkalyq ózgerister paıda bolatyny anyqtaldy.

Zertteý «The Proceedings of the National Academy of Sciences» jýrnalynda jarııalanǵan.