Adal kásip: aýyldan túlegen jas maman ınjenerlik joldy qalaı eńserdi
PAVLODAR. KAZINFORM - Dıdardyń kásibı mamandyǵy – energetıka ınjeneri. Aıadaı ǵana aýyldan túlep ushqan jas jigit az ýaqyttyń ishinde Pavlodardyń №3 jylý-energııa ortalyǵyndaǵy tájirıbeli mamandar qataryna qosyldy. Búginde onyń ruqsatynsyz kásiporyndaǵy jóndelgen jabdyqtar iske qosylmaıdy.
Oblys ortalyǵynyń biraz bóligin jylý, jaryqpen qamtamasyz etip turǵan №3 JEO-da kásibı ári bilikti jas mamandardyń shoǵyry ósip keledi. Bul betkeıde kásiporyndaǵy tájirıbeli mamandar qataryna qosylǵan Dıdar Tóleýhanovty aıryqsha atap ótýge bolady. Jas jigit ýnıversıtetti támamdaǵan soń birden atalǵan stansaǵa jumysqa ornalasqan. Bıyl eńbek uıymynda turaqtap qalǵanyna on eki jyl bolypty.Tabandylyǵynyń arqasynda energetıka salasynyń kúrdeli býyndaryn ıgerip otyr.
«Qarapaıym aýyl balasymyn, úıdegi 6 uldyń kenjesimin. Anam jeke kásippen aınalyssa, ákem uzaq jyl polıtsııada eńbek etip, zeınetke shyqty. Mektepte oqyp júrgen ýaqytta fızıka salasyna asa qumartqanmyn. Sol sebep boldy ma eken, bilim uıasyn támamdaǵan soń «Elektr energetıkasy» mamandyǵy boıynsha oqý grantyna ıe bolyp, joǵary oqý ornyna tústim. Otbasymyzda bul salada menen ózge eshkim jumys istemeıdi. Kelinshegimniń mamandyǵy – tarıh pániniń muǵalimi», - dep áńgimeledi jas maman.
Ol munda alǵash elektr monteri bolyp qabyldansa, jyldar óte ınjener laýazymyna saı ekenin eńbegimen dáleldedi. Qazirgi laýazymy – elektr tsehyndaǵy joǵary voltti synaqtar júrgizý jáne ólsheý jónindegi ınjeneri. Mindeti – kúrdeli jáne aǵymdaǵy jóndeýden ótken kez kelgen óndiristik jabdyqty iske qospas buryn synaqtan ótkizý. Bul jabdyqtardyń qataryna transformatorlar, generatorlar, 6 kV kabeldik jeliler enedi. Sonymen qatar metall baılanystaryn jáne ózge de jabdyqtardy tekseredi.
«Eńbekte barlyǵy tájirıbemen keletinin jyldar óte túsindim. Qazir úsh adamnan turatyn brıgada basshysymyn. Mańyzdy jabdyqtardy aldyn ala tekseremiz. Eger jumysy kóńilimizden shyqpasa, aqaýdy izdeımiz. Ony tapqan soń iske jóndeý brıgadasy qosylady. Bıyl stansadaǵy úsh birdeı qazandyqty synaqtan ótkizdik. Tútinsorǵysh, elektr jelilerin aıyrǵysh, kabeldik jeliler jáne kómir ýatqysh jabdyqty tekserip shyqtyq. Basshylar maǵan tájirıbeli maman retinde senedi. Árıne qıyn kezeńder boldy, biraq tabandylyq pen kásibime berilgenimniń arqasynda barlyǵyn eńsere bildim. Búginde 6-razrıadty mamanmyn. Sońǵy jyldary bul saladaǵy tarıfterdiń óskeniniń nátıjesin áleýmettik turǵydan sezinip otyrmyz. Eń áýeli biz sııaqty qarapaıym qyzmetkerlerdiń jalaqysy ulǵaıdy. Qazir óz zamandastarymdy bul qyzmetke uıalmaı shaqyra alamyn. Sebebi burynǵydaı emes, qazir eńbekaqymyz laıyqty, otbasyn asyraýymyzǵa jetedi», - deıdi ol.
Jas maman Memleket basshysy Qasym-Jomart Toqaevtyń aldaǵy jyldy jumysshy mamandyqtar jyly dep jarııalaǵany qýantyp otyrǵanyn jetkizdi. Onyń nátıjesinde energetıka salasyndaǵy kadr tapshylyǵy, eńbekaqy máselesi sheshilip, mańyzdy ózgerister bolady dep úmittenedi.
Eske sala keteıik, Memleket basshysy bıylǵy Joldaýynda 2025 jyldy Jumysshy mamandyqtary jyly dep jarııalady.
