Abý-Dabıde fastfýd jarnamasyna tyıym salyndy

ASTANA. KAZINFORM — Bul bastama Healthy Living Abu Dhabi baǵdarlamasy aıasynda júzege asyrylady, dep habarlaıdy Kazinform agenttiginiń menshikti tilshisi.

Abý-Dabıdiń densaýlyq saqtaý departamenti qabyldaǵan jańa saıasatqa sáıkes, BAÁ astanasynda maı, qant jáne tuzy kóp taǵamdar men sýsyndardyń sýretterin bılbordtarda, tsıfrlyq ekrandarda jáne syrtqy jarnamanyń kez kelgen túrinde ornalastyrýǵa tyıym salyndy.

Bul shara semizdik, qant dıabeti jáne basqa da sozylmaly aýrýlarmen kúresýge baǵyttalǵan keń aýqymdy baǵdarlamanyń bir bóligi sanalady.

Syrtqy jarnamaǵa tyıym salýmen qatar, bılik taǵam ónimderin olardyń taǵamdyq qundylyǵyna qaraı A-dan (eń paıdaly) E-ge (eń zııandy) deıin tańbalaý júıesin engizdi.

Sonymen birge jergilikti sýpermarketterde eń zııandy ónimder adam az júretin aımaqtarǵa ornalastyrylatyn bolady.

Buǵan deıin Qazaqstan men BAÁ kompanııalary 335 mln dollar somaǵa jýyq kelisimderge qol qoıǵany habarlandy.

Sondaı-aq, Qazaqstan BAÁ-ge astyq, et jáne maıly daqyldar eksportynyń kólemin arttyrmaq.