«Abonement satyp alǵan qazaqstandyqtar balaǵat sózder aıta alady» – feık

ASTANA. QazAqparat – Internet jelisinde qazaqstandyqtar qoǵamdyq oryndarda balaǵat sóz aıtýǵa abonement satyp alyp, bir saǵat ishinde kez kelgen jerde dóreki sóıleı alatyny týraly aqparat tarady. Al abonementsiz mundaı áreket jasasańyz aıyppul salynady-mys. Bul málimet – jalǵan, dep habarlaıdy QazAqparat.

«Qoǵamdyq orynda balaǵat sóz aıtýdy qalaǵan kez kelgen qazaqstandyq aıyppuldy aldyn ala tólep, ońdy-soldy bylapyt sóz aıta alady. Bul rette aıyppul somasy 50 paıyzǵa azaıady», - dep jazylǵan «Shuǵyl news» dep kórsetilgen ınternet-saıtta.

Odan ári Іshki ister mınıstrliginiń baspasóz hatshysy retinde tanystyrylǵan jýrnalıst Nurdildá Orazdyń sózi keltirilgen. «Degenmen, túsinýińiz kerek, tólengen birjolǵy aıyppul bir ǵana jerde jáne bir saǵattan aspaıtyn ýaqyt ishinde balaǵat sóz aıtýǵa quqyq beredi. Іshki ister mınıstrligi bir aılyq jáne jyldyq abonement engizý máselesin qarastyryp jatyr», - dep berilgen N.Orazdyń sózi.

Jýrnalıst Nurdildá Oraz Instagram-daǵy jeke paraqshasynda bul aqparattyń jalǵan ekenin aıtady.

«Jalǵan aqparat! Meniń atymnan jarııalapty. Aldymen, ishki ister salasynan ketkenime jarty jyldan asty. Ekinshiden, saıttyń siltemesi joq. Aty men zaty joq. Bireýdiń abyroıyna kúıe jaǵýmen aınalysatyndardy báribir tabý qajet. Іshki ister organdaryna aryzdanýdan basqa amal joq», - dep jazady ol.