Ábilqaıyr Sqaqov MÁMS-ti reformalaý týraly petıtsııa talaptaryna pikir bildirdi
ASTANA. KAZINFORM – «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń basqarma tóraǵasy Ábilqaıyr Sqaqov MÁMS-ti reformalaý týraly petıtsııa talaptaryna pikir bildirdi.
Petıtsııanyń birinshi talaby birneshe jerde jumys isteıtin adamnyń tek bir aılyǵynan ǵana MÁMS jarnasyn aýdaratyndaı júıe qurý bolatyn.
«MÁMS jarnasyna tólenetin somanyń joǵary shegi bar. Tipti birneshe jerde jumys istegen kúnniń ózinde aı saıyn 17 myń teńgeden artyq tólemeıdi. Óıtkeni MÁMS jarnasy alynatyn eń joǵary tabys 850 myń teńge dep belgilengen», - dedi qor basshysy.
Ekinshi talapta kásipkerler tabysy toqtap turǵan kezde MÁMS jarnasyn aýdarýdan bosatý usynylǵan.
«Eger kásipkerdiń tabysy toqtap qalsa, óziniń qyzmetin ýaqytsha toqtatýǵa haqyly. Qyzmet toqtatylsa, salyq pen MÁMS jarnasy, tıisti deklaratsııa da toqtatylady», - dedi Ábilqaıyr Sqaqov.
Úshinshi talap ár adam ózi aýdarǵan jarnany jınaqtap, qajet bolǵan jaǵdaıda jaqyn adamyna bere alý kerek degenge saıady.
«Bizde áleýmettik medıtsınalyq saqtandyrý úlgisi jumys isteıdi, ıaǵnı yntymaqty model bar. MÁMS jarnasyn basqa adamǵa berý nemese usyný qarastyrylmaǵan. MÁMS júıesiniń negizgi qaǵıdaty osyndaı. Seniń qazir aýdarǵan jarnań qazir medıtsınalyq kómekke muqtaj adamǵa jumsalady. Al sen medıtsınalyq kómekti qajet etkende ózgelerdiń jarnasy jumsalady. Biraq men petıtsııa týraly resmı pikir bildirgim kelmeıdi. Bul aldyn ala sheshim nemese sarapshylyq kózqaras bolyp qabyldanýy múmkin. Ár nárse óz ýaqytymen bolǵany durys», - dedi ol.
