Ábilhan Qasteevtiń nemeresi Open Eurasia baıqaýynda júldeger atandy

ASTANA. QazAqparat - Talantty sýretshi, qazaq beıneleý óneriniń negizin qalaýshylardyń biri Ábilhan Qasteevtiń nemeresi Open Eurasia-2017 baıqaýynda ekinshi oryndy ıelendi, dep habarlaıdy «QazAqparat» HAA baıqaýdyń saıtyna silteme jasap.

Shvetsııa astanasy Stokgolmde Open Eurasia-2017 baıqaýy qorytyndylandy. Ashyq ádebı baıqaýdyń «Illıýstratsııa», «Vıdeofılm», «Aýdarma» jáne «Ádebı shyǵarma» atty tórt sanatynda álemniń 8 elinen barǵan 20 qatysýshy jeńimpaz atandy.

Open Eurasian Literature Festival & Book Forum VI Halyqaralyq ádebı festıvaliniń ashylý saltanatynda jeńimpazdardyń esimi jarııalandy. Syılyq laýreaty Dáýren Qasteev «Illıýstratsııa» sanatynda ekinshi oryndy aldy.

«Ádebı shyǵarma» sanatynda «Poezııa» atalymy boıynsha Qazaqstannyń taǵy bir ókili Ǵalym Jaılybaı úshinshi oryn alsa, «Proza» atalymyndaǵy úshinshi oryndy Sáýle Dosjan (Qazaqstan) men Verdı Iossı (Reseı) ózara bólisti.

2017 jyly «Ashyq Eýrazııa-2017» baıqaýyna álemniń 37 elinen 1100-den astam daryn ıesi óz shyǵarmalaryn usynǵan. Buryn Open Eurasian Literature Festival & Book Forum festıvali aıasyndaǵy baıqaý jeńimpazdaryn marapattaý rásimi Qyrǵyzstanda, Qazaqstanda, Ulybrıtanııada ótken bolatyn. OEBF festıvali men Open Eurasia baıqaýyn Eýrazııa shyǵarmashylyq gıldııasy kommertsııalyq emes uıymy men Hertfordshire Press baspa úıi uıymdastyryp keledi.