Ábıba Olımpıada júldesiniń jolashary bolýy múmkin – Bımyrza Taıjanov
ATYRAÝ. KAZINFORM – Eki kúnnen keıin Parıj tórinde Olımpıada oıyndarynyń jalaýy kóteriledi. Jahan jurty kóz tigetin, dúbirge toly bolatyn dodada dzıýdodan alǵashqy básekede Ábıba Ábýjaqynova baq synaıdy. Qazaq dzıýdoshysynyń daıyndyǵy qalaı ótti? Onyń qarsylastary kimder bolýy múmkin? KAZINFORM tilshisiniń saýaldaryna Atyraý oblystyq dzıýdo federatsııasynyń vıtse-prezıdenti Bımyrza Taıjanov jaýap berdi.
– Bımyrza Amangeldiuly, qazaq eli Olımpıadada júlde alady dep úmit artyp otyrǵan sportshynyń biri – Ábıba Ábýjaqynova. Dzıýdoshy arý Atyraýda qashannan beri jattyǵatyn edi?
– Elimizdiń ár óńirinde halyqaralyq saıystarda el namysyn qorǵap júrgen sańlaq dzıýdoshylar az emes. Sonyń biri – Ábıba Ábýjaqynova. Qazaq jerinen tysqary elde ómirge kelgenimen, júregi qazaq dep soǵatyn ultjandylyǵy menmundalap turady. Ata-anasymen elge qonys aýdarǵannan beri sporttaǵy baǵy jandy deýge bolady. Ony sońǵy 4-5 jyldan beri atyraýlyq bapker Meırambek Esmaǵambetov jattyqtyryp keledi.
Ár sportshynyń armany – Olımpıada chempıony ataný. Ábıbanyń Olımpıadaǵa deıingi júldesi az emes. Ol – dzıýdodan el chempıony. 2021 jyly Bishkekte, 2022 jyly Astanada ótken Azııa chempıonatynda kúmis júldeni ıelendi. Eki jyl buryn Tashkenttegi Álem chempıonatynda qola júldege ıe boldy. Al, 2023 jyly Portýgalııada jalaýy jelbiregen Gran-prı serııasyndaǵy týrnırde jeńimpaz atandy.
Ábıba Parıj Olımpıadasyna osyndaı jetistikterimen baryp otyr. Onyń daıyndyǵyna basa mán berildi. Joǵaryda aıtqan dodalarda baq synap, júlde alýdyń ózi Ábıbanyń daıyndyǵy myqty ekenin kórsetedi.
– Ábıbanyń salmaǵynda qaı eldiń sportshylary qarsylas bolýy múmkin?
– Olımpıadada alǵashqylardyń qatarynda baq synaıtyn Ábıba 48 keli salmaqta kúresedi. Sporttyń qaı túrinde de jeńil salmaqta qarsylastar az bolmaıdy. Ábıbanyń salmaǵyndaǵy qarsylastary osal emes. Onyń ústine Olımpıadaǵa kileń myqtylar irikteledi ǵoı. Biraq, bizdiń balýanymyz qarsylastarynyń aıla-tásilin, daıyndyq deńgeıin biledi. Jattyqtyrýshysy Meırambek Esmaǵambetovpen birge Burynnan kúresip júrgen Brazılııa, Qytaı, Japonııa balýandarynyń osal tusyn tabý jolyn zerttedi. Máselen, Bishkektegi Azııa chempıonatynyń aqtyq synynda qytaılyq Lı ıAnannan utylǵan edi. Al, Astanada ótken osyndaı chempıonatta japon balýany Vakana Kogaǵa ese jiberip aldy. Japon sportshysy solaqaı balýanmen kúresse, abdyrap qalatynyn eskeredi dep oılaımyn. Óıtkeni, Ábıba da – solaqaı.
Endi Azııa, Álem chempıonattarynda ketken esesin Olımpıada dodasynda qaıtaryp, elge júldemen oralatynyna senemin. Jalpy Ábıba Ábýjaqynova – qatelik jibermeıtin, tájirıbesi ábden tolysyp, ysylǵan dzıýdoshy. Sporttyń osy túrimen 11 jasynan beri aınalysatyn dzıýdoshy qyzymyzdyń altyn medal alatyn jóni bar. Bul – onyń basty maqsaty. Sondyqtan, Ábıbany Olımpıada júldesiniń jolashary bolsyn dep tileıik.
– Olımpıadada baq synaıtyn taǵy bir balýan – Esmıgýl Kýıýlova. Onyń daıyndyǵy týraly ne aıtasyz?
– Esmıgýl da – elge oralǵan qandasymyz. Talaby taýdaı, izdenetin dzıýdoshymyz tek elimizge ǵana emes, alys-jaqyn elderge de tanylyp júr. Bıyl 63 keli salmaqta Azııa chempıonatynyń qol júldegeri atandy. Ábıbaǵa qaraǵanda, halyqaralyq dodadan alǵan júldesi az bolýy múmkin. Alaıda, sheberligi shyńdalyp keledi. Onyń da Olımpıadan júlde alatyn múmkindigi bar. Tek aptyqpaı, asyqpaı, sabyrmen kúresse ǵana nátıjege qol jetkizedi dep oılaımyn.
– El úmit artyp otyrǵan dzıýdoshylarǵa jergilikti jerde qandaı qoldaý kórsetildi?
– Qaı jarysqa qatyssa da aldymen sportshylardyń daıyndyǵyna kóńil bólinedi ǵoı. Al, tórt jylda bir ótetin Olımpıadanyń jóni bólek. Sol sebepten, Ábıba men Esmıgýldiń halyqaralyq reıtıngte upaı beriletin jarystarǵa barýyna barynsha qoldaý kórsetildi. Qazir Ábıba reıtıngte aldyńǵy orynda tur. Esımgýldiń de reıtıngi kóterildi. Olımpıadaǵa attanar aldynda eki sportshyny Atyraý oblysynyń ákimi Serik Shápkenov arnaıy qabyldap, sátti sapar tiledi. Oblystyq dzıýdo federatsııasynyń tarapynan udaıy qarjylaı qoldaý kórsetip kelemiz.
Qazaq eli Olımpıadaǵa qatysýǵa attanǵan sportshylardyń jeńispen oralýyna úmit artyp, eń jaqsy tilegin arnap otyr. «Jaqsy sóz – jarym yrys» degendeı, eldiń úmiti aqtalyp, sportshylarymyzdyń júldesi kóbeıgenin qalaımyn.
Eske sala ketelik, budan buryn Ábıba Ábýjaqynova basty maqsaty – Olımpıadanyń fınalyna jetip, altynǵa talasý ekenin aıtqan edi.
