Abaıǵa eskertkish qoıylǵan álem elderin velosıpedpen aralamaqpyn – almatylyq saıahatshy
«Meniń velosıpedpen saıahattaýdaǵy basty maqsatym – ishki týrızm men salaýatty ómir saltyn nasıhattaý. Óz elimizden bólek, shetelge de saıahattaýdy bastap kettim. Mendegi nıet sheteldikter Qazaqstandy jaqyn tanı tússe, bizdiń elge týrıst bolyp kelse. Sebebi elimizde týrıstik ádemi jerler jetkilikti. Bizdiń eldiń tabıǵaty erekshe. Óz oıym múmkindik barda el, jer kórip, jan dúnıesin damyta túsken durys dep oılaımyn. Biz alǵashqy sapardy (baýyrymmen birge) Abaı atamyzdyń 175 jyldyq mereıtoıyna oraı Almatydan Semeıge jaıaý barýdan bastadyq. «Abaı» qory bizge arnaıy tósbelgi taǵyp, qurmet kórsetti. Osy oraıda «Abaıǵa aparar jol» jobasy aıasynda aldaǵy ýaqytta uly aqynnyń qurmetine arnalǵan saparym jalǵasyn tabady», - dedi Damır Kýsheev.
Sondaı-aq, velosaıahatshy bıyl jazda Túrkııaǵa baryp, ondaǵy Abaı eskertkishterine qurmet kórsetken.
«Túrkııaǵa sapar barysynda Abaı atamyzdyń eskertkishterine baryp taǵzym ettim. Uly aqynǵa Ystanbul, Ankara jáne Antalıa qalasynda eskirtkish qoıylǵan. Aıtpaqshy, Ankarada aqynnyń qurmetine 2 birdeı eskertkish ornatylǵan», - deıdi ol.
Jerlesimizdiń endigi jospary Abaı eskertkishi ornalasqan álemdegi barlyq elder men qalalardy velosıpedpen aralap shyǵý.
«Álemniń biraz elinde Abaıǵa eskertkish qoıylǵan. Onyń qatarynda Italııa, Frantsııa, Reseı, Qytaı, Majarstan, Mysyr jáne taǵy basqa elder bar. Osy turǵyda uly aqynǵa eskertkish qoıylǵan álem qalalaryn velosıpedpen aralap ótpekpin. Ózime osyndaı tapsyrma qoıyp otyrmyn», - dedi almatylyq saıahatshy.
Buǵan deıin habarlaǵanymyzdaı Damır Kýsheev Ońtústik Koreıa astanasy Seýlden Pýsan qalasyna velosıpedpen barmaq. Qazir ol Seýlge jetti jáne ony 700 shaqyrymdyq jol kútip tur.
Aıta keteıik, Ońtústik Koreıa astanasy Seýl qalasynda da Abaı eskertkishi bar.
