Abaıdyń 175 jyldyǵyna oraı 100 óleńi ıspan tiline aýdarylady

NUR-SULTAN. QazAqparat - Elordada ótip jatqan Eýrazııa astanalary jazýshylarynyń halyqaralyq forýmynda qazaqtyń 100 aqynyn óz tiline aýdarǵan ıspan aqynymen kelisimshart jasaldy, dep habarlaıdy QazAqparat tilshisi.

Qazaqstan Jazýshylar odaǵynyń Nur-Sultan qalalyq fılıalynyń dırektory Dáýletkereı Kápulynyń aıtýynsha, madrıdtik aqyn Abaıdyń 100 óleńin ıspan tiline aýdarýǵa kelisim bergen.

«Bul forýmǵa Eýrazııa keńistigindegi astanalarda turatyn, álemge esimi belgili ádebıet tulǵalardy shaqyrdyq. Sonyń ishinde búkil Latyn Amerıkasyna tanymal, ıspan tildi memleketterdiń barlyǵy biletin, shyǵarmalary álemniń 35 tiline aýdarylǵan madrıdtik aqyn Hýnte Horhe Padrondy erekshe ataýǵa bolady. Ol osydan eki jyl buryn qazaqtyń úsh ǵasyrlyq ádebıetin ıspan tiline aýdaryp, kitap etip shyǵarǵan bolatyn. Kelesi jyly uly Abaıdyń 175 jyldyǵyn toılaǵaly otyrmyz. Forým aıasynda osy madrıdtik aqynmen Abaıdyń 100 óleńin aýdarý týraly kelisimshartqa qol qoıamyz», - dedi Jazýshylar odaǵynyń ókili.

Forým aıasynda qazaq aqyndaryn baýyrlas elderdiń tiline aýdarý boıynsha da birneshe kelisimder jasalmaq.

«Budan bólek, ankaralyq ádebıetshi ǵalymdy shaqyrdyq Ol kisi qazirgi qazaq ádebıetinen 7 kitap aýdarǵan. Men bir-eki mysalyn ǵana aıtyp turmyn. Áıtpese búgingi forým qonaqtarynyń barlyǵymen tyǵyz baılanys ornatýdy josparlap otyrmyz. Forýmǵa Birikken Arab Ámirlikteri Jazýshylar odaǵynyń, Aýǵanstan Islam Respýblıkasynyń jazýshylar odaǵynyń basshylary qatysyp otyr», - deıdi Dáýletkereı Kápuly.

Eske salsaq, búgin Nur-Sultan qalasynda Eýrazııa astanalary qalamgerleriniń forýmy ótip jatyr.