Abaıdyń 175 jyldyǵy: Aqyn-jazýshylar mereıtoıǵa bir kisideı atsalysady - Ulyqbek Esdáýlet

ALMATY. QazAqparat - Qazaqstan Jazýshylar odaǵynyń tóraǵasy Ulyqbek Esdáýlet qazaq halqynyń uly aqyny, aǵartýshysy Abaı Qunanbaıulynyń 175 jyldyǵyn merekeleý týraly Jarlyqtyń shyǵýyn qalamgerler qaýymy asyǵa kútkenin aıtty, dep habarlaıdy QazAqparat tilshisi.

«Abaıdyń 175 jyldyǵyn merekeleý Jazýshylar odaǵynyń, qalamgerlerdiń kútip júrgen qaýlysy bolatyn. Munyń jaı qaýly emes, Prezıdent Jarlyǵy bolyp shyqqanynda úlken mán bar. Qasym-Jomart Toqaevtyń ultymyzdyń uly aqynyn ulaǵattaýda erekshe janashyrlyǵy, tilge, ádebıetke degen janashyrlyǵy, Abaı Qunanbaevtyń shyǵarmashylyǵyna degen uly qurmeti dep bilý kerek. Bul Jarlyqta ǵylymı-praktıkalyq konferentsııalar, Abaıdyń shyǵarmashylyǵyna qatysty álem jurtshylyǵynyń qyzyǵýshylyǵyn arttyrý, álemge Abaıdyń qadir-qasıetin, jumbaǵyn túsindirý sııaqty úlken maqsat tur. Onyń ar jaǵynda buryn ketken olqylyq-kemshilikterdi eskere otyryp, Abaı shyǵarmalaryn álemniń jetekshi tilderine aýdarýǵa kóńil bólinýde», - dedi Ulyqbek Esdáýlet.

Jazýshylar odaǵy basshysynyń sózinshe, bul mereıtoıǵa Qazaqstan aqyn-jazýshylary da bir kisideı atsalyspaq.

«Árıne, bizdiń búkil jazýshylardyń, aqyndardyń atasy - Abaı. Bizdiń jazýshylar Abaı shyǵarmalaryn jas urpaq boıyna ana sútimen sińirýge, qadir-qasıetin túsindirýge bir kisideı at salysady. Abaı oqýlaryn ótkizý, zertteý maqalalaryn jazý, onyń júrip ótken jerlerimen saparlaý, aqynǵa baılanysty shyǵarmalardy sahnalaý, tolyqqandy durys fılm túsirý jáne taǵy basqa jumystar atqarylyp jatyr. Jańadan poetıkalyq qoıylymdardy iske asyrý, búkil balabaqshadan bastap mektepterde Abaı óleńderin jattatý, onyń Qara sózderiniń mánin ashyp berý, basqa da kóp is sharalar josparlanyp otyr. Kelesi jyl Túrksoı boıynsha nemese Qazaqstan kóleminde Abaı jyly bolyp jarııalanatyny anyq», - dedi U.Esdáýlet.

Aıta ketý kerek, 30 mamyr kúni QR Prezıdenti Qasym-Jomart Toqaev 2020 jyly Abaıdyń 175 jyldyq mereıtoıyn merekeleý týraly Jarlyqqa qol qoıdy.