Abaıdyń ıeliginde qansha bas mal bolǵan
SEMEI. KAZINFORM — Abaı Qunanbaıulynyń ıeligindegi mal sany jaıly tyń aqparat jarııalandy.
Uly aqyn Abaı Qunanbaıulyn el kóbine oıshyl, aǵartýshy retinde ǵana tanyp, onyń óz dáýirinde aýqatty, iri sharýashylyq ıesi bolǵanyna nazar aýdara bermeıdi. Osy rette Abaı oblysy Mádenıet, tilderdi damytý jáne arhıv isi basqarmasy hakimniń bolmysyn tolyq tanýǵa múmkindik beretin tarıhı derekterdi usyndy.
— Abaı Qunanbaıulynyń arǵy atalary da, ákesi Qunanbaı Óskenbaıuly da — bı, bolys bolyp, el basqarǵan, sózi de, ózi de salmaqty adamdar bolǵany tarıhtan málim. Osyndaı otbasynda dúnıege kelgen Abaıdyń da jastaıynan el isine aralasyp, basqarýshylyq qabileti erte tanyldy. 1915 jyly jarııalanǵan tarıhı derekterge súıensek, Abaıdyń ıeliginde 593 jylqy (onyń ishinde 108 jabaǵy men 167 qulyn), 51 sıyr, 51 túıe, 1417 qoı bolǵan, — delingen aqparatta.
1878 jyly Abaı Semeıde qurylǵan oblystyq statıstıka komıtetiniń tolyq múshesi retinde tirkelip, óz óńiriniń áleýmettik-ekonomıkalyq, etnografııalyq, mádenı jaǵdaıyn zertteýge belsene qatysqan.
— Bul komıtetke múshe bolý — tek ataq emes, ol adamnan belgili bir dárejede saýattylyqty, qoǵamnyń damýyna beıjaı qaramaıtyn kózqarasty talap etti. Abaı bul mindetti abyroımen atqaryp, ólkeniń damýyna úles qosty. Uly aqynnyń mal-múlki týraly málimetter — jaı ǵana sandyq derek emes. Bul — onyń tulǵasynyń jan-jaqtylyǵyn, ómir súrgen ortasyn, sol dáýirdegi qazaq qoǵamynyń qurylymyn tanýǵa múmkindik beretin tarıhı aıǵaq, — delingen habarlamada.
Eske salsaq, osyǵan deıin Erevanda Abaı Qunanbaıuly atyndaǵy saıabaq ashylǵany habarlanǵan.