Abaı, Jetisý, Ulytaý oblystarynda saılaý ýchaskeleri qurylady – OSK

ASTANA. QazAqparat – 20 qarashada ótetin QR Prezıdenti saılaýy naýqanyna shamamen 20,5 mlrd teńge jumsalady dep josparlanýda. Bul týraly Ortalyq saılaý komıssııasynyń múshesi Sabıla Mustafına málim etti, dep habarlaıdy QazAqparat tilshisi.

«Saılaý komıssııasynyń 70 myńnan astam múshesiniń eńbekaqysy eń tómengi jalaqy krıterıine saı tólenedi. 2019 jyly Prezıdent saılaýy ótkende eń tómengi jalaqy 42 500 teńge boldy. Bıyl elimizde eń tómengi jalaqy 60 myń teńgege kóterildi», - dedi Sabıla Mustafına Ortalyq saılaý komıssııasy alańynda ótken baspasóz máslıhatynda.

Sondaı-aq, OSK múshesi bıyl qurylǵan úsh oblysta (Abaı, Jetisý, Ulytaý) saılaý ýchaskeleri qurylatynyn jetkizdi.

«Búginde biz Qarjy mınıstrligine saılaý naýqanyna arnalǵan shyǵystardyń shamamen alynǵan smetasyn usyndyq. Qazir bul másele talqylanyp jatyr. Saılaý naýqanyna 20,5 mlrd teńge kóleminde qarjy qajet dep otyrmyz. Sondaı-aq saılaý jáshikterin satyp alýǵa qarjy suradyq», - deıdi ol.

Aıta keteıik, erteńnen bastap Prezıdent saılaýyna kandıdattardy usyný bastalady.

Al kandıdattardyń úgit-nasıhat júrgizý sharasy 21 qazanda bastalady.