«Abaı týraly estelikter» kitaby jaryq kórdi
Kitap «Ádebıettiń áleýmettik mańyzdy túrlerin satyp alý, basyp shyǵarý jáne taratý» baǵdarlamasy aıasynda jaryq kórdi. Jınaqtyń jalpy redaktsııasyna jetekshilik etken jazýshy, Abaıdyń «Jıdebaı-Bórili» qoryq mýzeıiniń dırektory Bolat Júnisbekov.
Oqyrmandar bul týyndydan QR Tuńǵysh Prezıdenti Nursultan Nazarbaevtyń hákim Abaıdyń ıÝNESKO kólemindegi 150 jyldyq mereıtoıy qarsańyndaǵy «Abaı týraly sóz» baıandamasymen, Abaı Qunanbaevtyń nemere inisi Árham Kákitaıuly men balasy Turaǵul Abaıulynyń, zamandasy ári shákirti, kórnekti aqyn Kókbaı Janataıulynyń, abaıtanýshy, shejireshi Nııazbek Aldajarovtyń estelikterimen tanysa alady.
«Abaıǵa qatysty ár derek, árbir tarıhı jazba baǵa jetpes qundylyq. Sol qundylyqtardy muraǵat túkpirinde eleýsiz qalyp qoımaı, búgingi qaýymdy keshegi kúnderdiń syr-sıpatyna qanyqtyryp otyrǵany abzal. Abaıdy taný arqyly ómir qubylystaryn bilip, qoǵam damýynyń qupııalaryna da tereńirek boılaıtynymyz anyq. Osy turǵydan kelgende «Abaı týraly estelikter» jınaǵy tek abaıtanýshylar men oqytýshy, stýdentterdiń ǵana emes, oıly oqyrmannyń suranysyn qanaǵattandyratyn qazyna», - deıdi mýzeı dırektory Bolat Júnisbekov.
