Abaı rýhanııaty: «Báıterek» holdıngi qyzmetkerleri aqyn murasyn dáriptedi
ASTANA. KAZINFORM – Elordada uly aqyn Abaı Qunanbaıulynyń 180 jyldyq mereıtoıyn atap ótý jalǵasyp jatyr. Keshe «Báıterek» ulttyq basqarýshy holdınginde oıshyl aqynnyń rýhy men shyǵarmashylyǵyna arnalǵan erekshe kesh ótti.
— Búgin uly aqyn Abaıdyń rýhy men rýhanııatyn dáripteý úshin jınalyp otyrmyz. Bizdiń holdıng pen enshiles kompanııalar el ekonomıkasyn damytý baǵytynda ǵana jumys istemeıdi, rýhanı, mádenı qundylyqtardy da qatar alyp júredi. Osy oraıda elimizde dúbirletip toılap jatqan Abaı Qunanbaıulynyń mereıtoıyn bizdiń holdıng qyzmetkerleri atap ótip otyrmyz. Qurmetti qaýym, Abaı murasy men ulaǵaty búgingi jıynnyń arqaýy bolmaq. Búgin ortamyzǵa Abaıtaný salasynda eleýli eńbek etip júrgen ǵalymdar toby arnaıy kelip otyr, — dedi «Báıterek» holdınginiń basqarýshy dırektory Nııaz Kóshkimbaev.
Sondaı-aq basqarýshy dırektor jınalǵan qaýymǵa Abaıdyń «Qulaqtan kirip, boıdy alar» óleńin oqyp berdi.
Odan ári sózdi «Abaı akademııasy» ǵylymı-zertteý ınstıtýtynyń dırektory, fılologııa ǵylymdarynyń kandıdaty, dotsent Jandos Áýbákir alyp uly aqynnyń ereksheligi men adamzatqa qaldyrǵan murasy týraly áńgimelep berdi.
— Halyq Abaıdyń murasyn izdep, ańsap tanıtyn dárejege jetti desek, artyq aıtý emes. Ýaqyt ótken saıyn biz Abaı men onyń álemine jaqyndap kelemiz. Aqynnyń murasyn kúndelikti dáripteı tússek, bizdiń kózqarasymyz ózgerip damı túsetini sózsiz. Biz Abaıdy tolyq taný úshin, onyń zamanyn bilýimiz kerek, — deıdi ol.
Onyń aıtýynsha, oıshyl Abaı óz tóńireginen bastap, barsha jurtty bilim alýǵa shaqyrdy.
— Alashtyqtarda Abaıdy oqyǵannan keıin baryp, eń negizgi dúnıe, qundylyq onyń shyǵarmalary ekenin jıi aıtyp júrdi. Endi qazirgi zamanda biz uly Abaı qaldyrǵan ilim-bilim men murasyn odan ári jalǵastyrýymyz kerek, — deıdi abaıtanýshy.
Sonymen qatar «Abaı akademııasy» ǴZI gýmanıtarlyq zertteýlerdi úılestirý bóliminiń basshysy, f.ǵ.k., dotsent Altynaı Asqarova men bas ǵylymı qyzmetker Láılá Demesinova kesh qonaqtaryna Abaı shyǵarmalarynyń rýhanı-estetıkalyq bolmysy, onyń búgingi qoǵamdaǵy ıdeıalyq máni, jas urpaq sanasyna tıgizer áseri jaıynda tushymdy pikirlerin bólisti.
Kesh sońy uly aqynnyń 180 jyldyq mereıtoıyna arnalǵan is-sharalar sheńberinde «Báıterek» holdıngi qyzmetkerleriniń balalary arasynda uıymdastyrylǵan «Abaı — halyq qazynasy» atty sýret baıqaýynyń jeńimpazdaryn marapattaý rásimine jalǵasty. Marapattardy apparat basshysy Dına Akrachkova tabystady.
Sondaı-aq jınalǵan qaýymǵa Abaı shyǵarmalarynan kishigirim kontsert qoıyldy.