Abaı oblysynda qurylys qarqyn alady
«25 jyl ishinde Semeıde turǵyn úı qurylysy turalap qalǵany ras. Osyǵan oraı, aldaǵy úsh jylda 1 mıllıonnan astam sharshy metr turǵyn úı paıdalanýǵa beriledi», - delingen oblys ákimdigi usynǵan aqparatta.
«Qýatty óńirler – el damýynyń draıveri» ulttyq jobasy sheńberinde 2023 jylǵa kredıttik turǵyn úı qurylysy men olarǵa ınjenerlik jelilerdi salý, sýmen jabdyqtaý jelilerin salý jáne rekonstrýktsııalaý, oblystyq jáne aýdandyq mańyzy bar joldardy jóndeý kózdelgen.
Semeıdegi eki kópirdi jóndeý mindeti tur. Úsh jylda bitirý tapsyrylǵan jańa kópirdiń qurylysy bıyl bastalyp ketti. Avtokólik kópirin rekonstrýktsııalaýdy jalǵastyrýǵa respýblıkalyq bıýdjetten 2 mlrd teńge bólindi.
«Memleket basshysy aspaly kópirge kúrdeli jóndeý jumystaryn júrgizýdi tapsyrdy. Bıyl kópirge japondyq mamandar zertteý júrgizgen. Endi Japonııanyń Kólik mınıstrligimen ekijaqty kelissózder júrgizý josparlanyp otyr. Sodan soń esepteýler jáne zertteý nátıjeleri usynylady», - deıdi oblys ákimi Nurlan Uranhaev.
Ákimniń aıtýynsha, Semeıdegi balalardy arnaýly áleýmettik qyzmettermen qamtý máselesi Qaraǵaıly shaǵyn aýdanynda 150 oryndyq ońaltý ortalyǵyn salý arqyly sheshilmek. Bul ortalyq qala turǵyndaryna ǵana emes, túgel oblys halqyna qyzmet kórsetedi.
«Erekshe qajettilikteri bar balalar úshin memlekettik áleýmettik tapsyrys kólemi 4 esege ulǵaıtylady. Semeı qalasynda tirek-qımyl apparaty buzylǵan jáne psıhonevrologııalyq aýrýlary bar balalarǵa arnalǵan 150 oryndyq 2 ońaltý ortalyǵyn salý josparda bar», - deıdi aımaq basshysy.
«Aýyl – el besigi» jobasy aıasynda eldi mekenderdi damytý úshin Úrjar aýdanynyń Úrjar aýylynda 10 tósektik kúndizgi statsıonar men 50 kelýshige arnalǵan dárigerlik ambýlatorııa salý josparlanǵan. Úrjar aýdanynyń Taskesken aýylynda, Abaı aýdanynyń Kókbaı aýylynda sport modýlderi salynady. Kentishilik joldardy ortasha jóndeýge qatysty 33 joba qolǵa alynyp, 3 medıtsınalyq nysan, 4 bilim berý mekemesi kúrdeli jóndeýden ótkiziledi», - deıdi Nurlan Uranhaev.
«Jaıly mektep» ulttyq jobasy aıasynda 5 orta bilim beretin mekteptiń qurylysyn bastaýǵa 9,2 mlrd teńge qarastyryldy. «Aýyldyq densaýlyq saqtaýdy jańǵyrtý» pılottyq ulttyq jobasy sheńberinde eldi mekenderde 65 bastapqy-medıtsınalyq-sanıtarlyq kómek obektilerin salýǵa jobalaý-smetalyq qujattamalar ázirlenbek.
Sondaı-aq, Semeıde jańa jylý elektr ortalyǵy salynbaq. Ertistiń sol jaǵalaýy men oń jaǵalaýyndaǵy eki ýchaske buǵan deıin eki jylý kózin salý alańy bolyp belgilengen. Alaıda, JEO-ny ornalastyrý týraly túpkilikti sheshim «Samuryq-Energo» AQ tarapynan tehnıkalyq-ekonomıkalyq negizdeme ázirleý barysynda qabyldanady.
Aıta ketsek, aımaqty aýyz sýmen qamtý baǵytynda josparlanyp otyrǵan birqatar joba bar.
«Búginde óńir boıynsha halyqtyń taza sýmen qamtamasyz etilýi – 92,5%. Bul kórsetkishti 100%-ǵa jetkizý úshin 2023-2025 jyldary 52 myń adamdy qamtıtyn 93 joba iske asyrylmaq, onyń 56-sy Semeı qalasyna tıesili», - delingen ákimdik habarlamasynda.
«2022 jyldyń 11 aıynda oblys ekonomıkasyna 5,5% ósimmen 329 mlrd teńge ınvestıtsııa tartylǵan. Jyl sońyna qaraı ınvestıtsııa kólemi artyp, onyń ishinde Semeı qalasynyń úlesi 44,5% boldy. 981 jańa jumys ornyn qurýmen 13 ınvestıtsııalyq joba iske asyrylyp jatyr. Óńdeý ónerkásibinde 885 jumys ornyn qurýmen 4 joba júzege asyrylyp keledi. Onyń úsheýi Semeı qalasynda. Bıylǵy jyldyń І toqsanynda «Óndiris» ındýstrııalyq aımaǵynda qýattylyǵy jylyna 600 tonna bolatyn jartylaı et fabrıkattaryn óndirý tsehyn iske qosý josparlanyp otyr», - delingen oblys ákimdigi usynǵan aqparatta.
Sonymen birge, 2023 jyly jumyrtqa óndiretin «Semey Qus» fabrıkasyn keńeıtý, 200 malǵa arnalǵan sút-taýar fermasyn qaıta jańǵyrtý kózdelgen.
Buǵan deıin Abaı oblysynda mektep tapshylyǵynan balalar qysylyp oqýǵa májbúr ekendigin jazǵan bolatynbyz.
Semeı qalasynda da oqýshylar jańa mektepterge zárý. Tipti shahardaǵy aldyńǵy qatardaǵy bilim ordalarynyń biri sanalatyn №6 mektep gımnazııada balalar syımaı jatyr. Naqty aıtqanda, 912 orynǵa shaqtalǵan mektepte 1843 oqýshy bilim alýda.
«Negizinen bul ǵımarat balet mektebi retinde 1984 jyly boı kótergen. 1988 jyly bizdiń mektep osynda kóship keldi. Sebebi oǵan deıingi nysan apattyq jaǵdaıda dep tanyldy. 2010 jyly bilim ordasyna ǵımnazııa statýsy berilgen. Qaıym Muhamedhanov kóshesinde ornalasqan mektebimizge oqýshylar qalanyń túkpir-túkpirinen kelip oqıdy. Sol úshin balalar syımaı jatyr. Kabınetterdiń ishi tym tar. Ǵımarat alǵash mektep retinde salynbaǵandyqtan aıadaı bólmelerde eki ǵana tereze bar», - degen edi bilim ordasynyń dırektory Maıra Ahmetova.
Tórt qabatty mekteptiń jalpy aýdany - 1612 sharshy metr. Pándik kabınetter sany - 69. Munda barlyǵy 150 adam qyzmet etse, onyń ishinde 126-y - muǵalim.
«Bıyl birinshi synypqa 150 oqýshynyń ornyna 283 bala qabyldanǵan. Gımnazııa bolǵan soń osynda bilim alýǵa qulshynys tanytatyndar jyldan-jylǵa kóbeıip keledi. Bizde bilim sapasy óte joǵary. Jańa oblys qurylǵannan keıin qalaǵa jan-jaqtan túrli mamandar kóship kelýde. Olar da balalaryn mektebimizge berýge nıet bildirýde. Sondyqtan bizge jańa mektep salynsa degen tilegimiz bar», - dedi M.Ahmetova.
Abaı oblysy ákimdiginiń málimetinshe, 2025 jylǵa deıin 11 mektep salynady.
«Ol 5 myńnan asa oqýshyny qamtıdy. Qosymsha 4 myń orynǵa oqý ǵımaratyn salamyz. Olardyń jobalyq-smetalyq qujattamasy daıyndalyp jatyr» delingen habarlamada.
Sonymen qatar bıyl Semeı qalasynda jalpy uzyndyǵy 55 shaqyrym kólik jolyn ortasha jóndeýden ótkizý kózdelgen.
Qala shetindegi 4 shaqyrym jaıaý júrginshiler joly da kúrdeli jóndeýden ótedi.
«Bıyl kóshelerdi keńeıtý boıynsha 4 joba ázirlenýde. Onyń ishinde Qarjaýbaıuly kóshesin Jangeldın kóshesinen Energetık kentindegi burylysqa deıin, Shýgaev kóshesin Qutjanov kóshesinen Qabylbaev kóshesine deıin, Shákárim dańǵylyn Dýlatov kóshesinen Jamaqaev kóshesine deıin jáne Qutjanov kóshesin Shýgaev kóshesinen Gagarın kóshesine deıin keńeıtý josparlanyp otyr», - delingen qala ákimdigi taratqan aqparatta.
Qalaǵa qaraıtyn aýyldardyń da joly jóndelmek. 2023 jyly 5 aýylda jalpy uzyndyǵy 13 shaqyrym bolatyn kireberis jolǵa ortasha jóndeý jumystary júrgiziledi.
Budan bólek, «Aýyl - el besigi» baǵdarlamasy boıynsha Kókentaý aýyldyq okrýginiń kentishilik joldary ortasha jóndeýden ótedi.
