Abaı oblysynyń kásipkeri qymyzdan balmuzdaqtyń 18 túrin shyǵarady
SEMEI. KAZINFORM - 2019 jyly 21 jasar Aıdyn Serikqazın qymyzdan balmuzdaq óndirý ıdeıasymen «Atameken» kásipkerler palatasynan 505 myń teńge kóleminde grant jeńip aldy.
2020 jyly «Bıznestiń jol kartasy-2025» baǵdarlamasy boıynsha ol 5 mln teńge kóleminde óteýsiz grant aldy.
Bul qarjyǵa jas kásipker Semeı qalasynda qymyz ben saýmaldan balmuzdaq shyǵaratyn shaǵyn tseh ashty. Sodan keıin avtorlyq quqyq alyp, «Qazice» atty ónimin patenttedi.
Qazir Aıdyn Astana, Almaty, Balqash, Óskemen, Semeı qalalarynda jáne Alakól demalys ortalyǵynda qymyz, saýmal, sondaı-aq túrli jemisterden jasalǵan balmuzdaqtyń 18-den astam túrin satady.
Shymkent pen Túrkistanda Qazice satý núktelerin ashý josparlanýda. Ónim halyq arasynda jaqsy suranysqa ıe.
Ulttyq brendti ilgeriletý jáne otandyq ónimdi shetelde tanymal etý maqsatynda geografııalyq kórsetkishti tirkeýge ótinim berildi.