Abaı oblysynda jańa «Keleshek mektebinde» erekshe formattaǵy Ashyq esik kúni ótti
SEMEI. KAZINFORM - Aıagóz qalasynda salynǵan jańa №11 jalpy bilim beretin «Keleshek mektebinde» erekshe formattaǵy Ashyq esik kúni uıymdastyryldy. «Keleshek mektep – kedergisiz orta» atty EduFest is-sharasyna 100-ge jýyq ata-ana, 200-den astam oqýshy men ustaz qatysty.
Qatysýshylar zamanaýı bilim ordasynyń qurylymymen, oqý protsesiniń erekshelikterimen jáne jańa formattaǵy oqý keńistiginiń múmkindikterimen tanysty.
Bul – Abaı oblysyndaǵy tórtinshi «Keleshek mektebi». 600 orynǵa arnalǵan úsh qabatty jańa ǵımarattyń qurylysy tolyq aıaqtalyp, ekinshi toqsanda oqýshylardy qabyldaýǵa daıyn. Mektepte 30 pán kabıneti, 6 zerthana, sport jáne akt zaly, kitaphana men oqý zaly bar. Oqý protsesi bir aýysymda jáne tolyqtaı memlekettik tilde júrgiziledi.
EduFest barysynda mektep keńistigi zerthanalyq jáne tájirıbelik sabaq alańyna aınaldy. Qatysýshylar jaratylystaný, matematıka, aǵylshyn tili, kórkem eńbek sııaqty pánderden ótkizilgen ashyq sabaqtarǵa qatysyp, jańa oqý ordasynyń artyqshylyqtaryn óz kózderimen kórdi.
Oqýshylardyń biri Arýjan Kabdýlmaratova, jańa mekteptiń zerthanalyq múmkindikteri erekshe áser qaldyrǵanyn aıtty.
- Maǵan eń unaǵany – hımııa zerthanasy. Buryn tek sýretten kóretin tájirıbelerdi óz qolymmen jasap kórdim. Sabaqtyń qyzyqty ótetinine kózim jetti. Osyndaı mektepte oqıtynyma qýanyshtymyn, – dedi ol.
Al 11-synyp oqýshysy Baqnur Berikbolov jańa tehnologııalyq synyptardyń oqýǵa degen yntany arttyratynyn atap ótti.
- Informatıka men robot tehnıkasy kabıneti erekshe unady. Qural-jabdyqtar jeterlik, jańa jobalar jasaýǵa barlyq múmkindik bar. Bıologııa zerthanasyndaǵy mıkroskoptar da zamanaýı. Buryn tájirıbe jasaý az bolsa, munda sabaqtyń ózi tájirıbege negizdelgen. Mundaı ortada oqýǵa da, izdenýge de ynta artady, – deıdi ol.
Muǵalimder de jańa keńistiktiń oqý protsesine serpin beretinin atap ótti. Informatıka pániniń muǵalimi Asel Nurlanqyzy bul mekteptiń oqytý tásilin túbegeıli ózgertetinin aıtady.
- Buryn tek taqta men dápter bolsa, endi oqýshy óz oıyn tájirıbe arqyly dáleldeı alady. Bul – muǵalim shyǵarmashylyǵyn arttyryp, oqýshynyń oılaý kókjıegin keńeıtetin orta. Naǵyz jańa dáýir mektebi, – dedi ustaz.
Aǵylshyn tili pániniń muǵalimi Aıgúl Tóleýbekqyzy da mekteptiń basty ereksheligi – zertteý mádenıetin damytýǵa jaǵdaı jasalǵanynda ekenin atap ótti.
- Keleshek mektebi – jańa oılaý men zertteý mádenıetiniń ortalyǵy. Munda ár balanyń qyzyǵýshylyǵyn ashýǵa múmkindik bar. Oqýshylar erkin oılap, óz oıyn dáleldeýge úırenedi, – deıdi ol.
Ata-analar da jańa mekteptiń jaılylyǵy men múmkindikterine rızashylyq bildirdi. Máselen, Janat Eralıeva mundaı bilim ordasy kópten kútken arman bolǵanyn aıtty.
- Buryn mundaı mektep arman edi. Endi balalarymyz zamanaýı, jaryq ári jyly ǵımaratta oqıdy. Balam qala ortasyndaǵy mektepke qatynap júretin, endi úıdiń janynda osyndaı jaıly mektep bar – bul biz úshin úlken qýanysh, – dedi ol.
Al Dana Baıanbaeva mektep ınfraqurylymynyń balaǵa qolaıly etip jasalǵanyn erekshe atap ótti.
- Abattandyrylǵan aýlasy, keń synyptary, jaıly ashanasy – bári balanyń yńǵaıy úshin jasalǵan. Osyndaı mektepte oqıtyn bala baqytty bolady dep senemin. Mundaı mektepter – keleshekke jasalǵan ınvestıtsııa, – dedi ata-ana.
Іs-shara sońynda oqýshylar Abaıdyń 180 jyldyǵyna arnalǵan kórinis qoıyp, óleń men qara sózder oqydy, án shyrqady. Mektep foıesinde «Bolashaq qabyrǵasy» ınteraktıvti aımaq uıymdastyrylyp, qonaqtar óz tilekterin jazyp qaldyrdy.
Aıagózdegi jańa «Keleshek mektebi» bilim ordasy ǵana emes, balanyń qyzyǵýshylyǵyn oıatatyn, ustazdyń shabytyn arttyratyn, ata-ananyń senimin nyǵaıtatyn ortaǵa aınalyp otyr. Bul – aımaqtyń bilim berý keńistigindegi jańa sapaly kezeńniń aıǵaǵy.