Abaı oblysynda úsh adam áli izdestirilip jatyr

ASTANA. KAZINFORM – Abaı oblysy Aıagóz aýdanyndaǵy Qaraǵash aýylynyń 2 azamaty Borly ózenin traktormen qıyp ótpekshi bolǵan kezde batyp qalǵan. Olar «Shalqar» sharýashylyǵynan Qaraǵash aýylyna qaraı jolǵa shyqqan.

Abaı oblystyq TJD málimetinshe, er adamdar joldy qysqartý úshin ózennen ótýge tyrysqan, biraq olar ózenniń ortasynda qalyp qoıǵan. Kýágerlerdiń aıtýynsha, oqıǵa ornyna kelgen qutqarýshylar turǵyndardy tappady.

«Sondaı-aq, 23 naýryzdan bastap 1977 jyly týǵan er adamdy izdeý jumystary júrgizilip jatyr. Aldyn ala boljam boıynsha ol Aıagóz ózeninen ótpek bolǵan kezde, attan qulap sýǵa batyp ketken. Er adamnyń „Shyǵys“ sharýa qojalyǵyna qaraı jolǵa shyqqany anyqtaldy.

Eskerte keteıik, joǵalǵan azamattar kóktemgi sý tasqynynyń aldyn alý jumystaryna esh qatysy joq», — dep jazdy vedomstvodan.

27 naýryz kúni saǵat 18:26–da Qorǵanys mınıstrliginiń MI-17 tikushaǵymen Borly ózeniniń aýmaǵyn aerovızýaldy ushý júzege asyryldy.

Іzdestirýge TJD, polıtsııa departamentiniń, Abaı oblysynyń jergilikti atqarýshy organdarymen, barlyǵy 82 adam, 4 júzý quraly, 9 birlik tehnıka, 4 pılotsyz ushý apparaty, jergilikti turǵyndar jumyldyryldy.

Joǵalǵan azamattardyń otbasyna TJD-niń psıholog mamandary tarapynan kómek kórsetilip jatyr.

Aıta keteıik, buǵan deıin Abaı oblysynda ózen ortasynda qalǵan eki adam joǵalyp ketkenin jazǵan bolatynbyz. Keıin taǵy bir azamattyń iz-túzsiz ketkeni anyqtaldy. 

Abaı oblysynda joǵalyp ketken 3 adamdy izdeýge tikushaq tartyldy.