Abaı oblysynda mektep oqýshysy zaǵıp jandarǵa arnalǵan taıaq jasap shyǵardy
Abaı oblysy Aıagóz qalasyndaǵy mektepte 8-synypta oqıtyn Eraly Ibraevqa zaǵıp jandarǵa aldyndaǵy kedergilerdi anyqtap, soǵylyp qalýyn boldyrmaıtyn qurylǵy jasap shyǵardy. Erekshe taıaqty jasaýǵa ınformatıka pániniń muǵalimderi Altynaı Ábilqasymqyzy men Araılym Ysqaqova járdemdesken, habarlaıdy Kazinform.
Eraly Ibraev kópbeıindi qazaq mektep-gımnazııasynyń 8A synybynda oqıdy. Kórý qabileti nashar adamdarǵa járdem etkisi kelgen jas ónertapqysh arnaıy datchıkteri bar taıaq jasap shyǵýǵa bel baılaǵan.
«Shákirtimiz osyndaı usynysymen bizge keldi. Onyń bastamasyn birden qoldadyq. Sóıtip, Eraly, men jáne taǵy bir muǵalim Araılym Ysqaqova úsheýmiz birigip jumysqa kiristik», - deıdi Altynaı Ábilqasymqyzy.
Onyń aıtýynsha, «Elektrondy jetekshi» dep atalǵan jobany iske asyrýǵa 2 aı ýaqyt ketipti. Sonyń nátıjesinde, zaǵıp jandarǵa arnalǵan erekshe taıaq jasalyp shyqty.
«Bul qurylǵy negizinen «Arduino» platasynan, ýltradybystyq jáne zýmmer datchıkteri men batareıadan turady. Osy datchıkterdi bir-birimen baılanystyryp, jasadym. Ustazdarym «S++» baǵdarlamasynda programmasyn qurýǵa kómektesti. Qurylǵyny qolǵa alǵan zaǵıp jandar aldaǵy kedergiler týraly eskertilip, soǵylyp qalmaıdy», - deıdi Eraly.
Óz sózinde ol qurylǵynyń jasalý barysyn da aıtyp berdi. Eń áýeli «Arduino» platasy men ýltrodybystyq datchık arasynda baılanys bolý úshin ekeýin symdar arqyly jalǵaǵan. Ol kedergilerdi kórýge múmkindik beredi. Keleside soǵylyp qalý qaýpin eskertý maqsatynda dybys shyǵaratyn zýmmer datchıgi qosylǵan. Qýat berip otyratyn batareıa salyndy. Sodan keıin kompıýterde «Arduino» qosylyp, «C++» tilinde programmasy jazyldy. Kompıýter men jasalǵan mashına USB shnýrmen jalǵanyp, jazylǵan programma elektrondy jetekshige júkteldi.
«Zamanaýı taıaqtyń basqa da múmkindikteri bar. Máselen, qurylǵyny zýmmer datchıgi arqyly dybystyq nusqaýlar beretin jáne paıdalanýshyǵa qajetti oryndy tabýǵa kómektesetin mobıldi qoldanbalarǵa, smartfondarǵa baılanystyrýǵa bolady. Odan keıin taıaq obektilerdi de tanıdy. Kompıýterlik kórý tehnologııasy qorshaǵan ortadaǵy túrli nysandardy anyqtaýǵa kómektesedi», - deıdi jas ónertapqysh.
Aldaǵy ýaqytta zaǵıp jandarǵa arnalǵan zamanaýı taıaqty satylymǵa shyǵarý josparlanyp otyr.
«Biraq ol úshin qurylǵyǵa áli de tolyqtyrýlar engizýimiz kerek. Qazir kózi nashar kóretin kóp adamnyń qulaǵy da estimeı jatady. Sondyqtan vıbratsııalyq datchık, zaǵıp jandy úıden baqylap otyrý úshin kamera, GPS navıgator qoısaq degen oılarymyz bar», - deıdi ınformatıka pániniń muǵalimi Araılym Ysqaqova.
