Abaı oblysynda bıyl 161 kópbalaly otbasy baspanaly boldy
Abaı oblysynda áleýmettik turǵyda osal sanattaǵy azamattardy turǵyn úımen qamtamasyz etý máselesi baqylaýda. Jyl basynan beri óńirde 161 kópbalaly otbasy qonys toıyn toılaǵan, dep habarlaıdy Kazinform.
Abaı oblysynyń ákimi Nurlan Uranhaevtyń tóraǵalyǵymen kópbalaly jáne az qamtylǵan otbasylardyń máselesin sheshýge baǵyttalǵan aımaqtyq qoǵamdyq jumys tobynyń otyrysy ótti.
«Otyrys barysynda az qamtylǵan jáne kópbalaly otbasylardy turǵyn úımen qamtamasyz etý, Aıagóz aýdany boıynsha kópbalaly otbasylarmen jumys isteıtin komıssııanyń atqarǵan jumysy, Semeı qalasynyń Komsomol kentiniń ınfraqurylymyn damytý (jolaýshylar tasymaly, jaryqtandyrý, aıaldama, jol jóndeý jáne t.b.), jeke sot oryndaýshylarynyń alımentti óndirý jumystary talqylandy. Máselen, jyl basynan beri 527 otbasy turǵyn úımen qamtamasyz etilgen. Onyń ishinde áleýmettik jaǵynan osal otbasylar – 244, kópbalaly otbasylar – 161, jetim balalar – 55, baspanasy apatty jaǵdaıda dep tanylǵan QR azamaty – 14 otbasy. Jyl sońyna deıin taǵy 150-ge jýyq páter berý josparlanǵan», - dep habarlady Abaı oblysy ákimdiginen.
Qazirgi tańda óńir boıynsha memleket qarjysyna 26 nesıelik turǵyn úı salynyp jatyr.
Sol arqyly baspanaǵa muqtaj turǵyndarǵa 1500-ge jýyq páter kiltin tabystaýǵa múmkindik berilmek.
Jıyn qorytyndysynda kóterilgen máselelerdi Abaı oblysynyń ákimi protokolǵa engizip, jaýapty mamandarǵa tıisti tapsyrmalar berdi.
