Abaı oblysynda aýyldyq okrýgterdi damytýǵa arnalǵan Jol kartasy ázirlenip jatyr
SEMEI. KAZINFORM – Abaı oblysynda aýyldyq okrýgterdi damytýǵa arnalǵan arnaıy Jol kartasy ázirlenip jatyr.
Abaı oblysynyń aýyl sharýashylyǵyn jaqsartý strategııasy sheńberinde jylyjaılar ornatý, mal sharýashylyǵyn damytý, áleýmettik-ekonomıkalyq damý jáne ınfraqurylymdyq obektiler salýdy qamtıtyn Jol kartasy ázirlenýde. Osy jumystardyń tıimdiligin arttyrýǵa Tselınograd aýdany Rodına aýylynyń tabysty tájirıbesi negiz bolyp otyr.
«Besqaraǵaı aýdanynyń aýmaǵynda jalpy aýdany 2 gektar bolatyn jyl boıǵy jylyjaı salý josparlanyp otyr. Bul azyq-túlik qaýipsizdigin qamtamasyz ete otyryp, maýsymdyq táýeldilikti azaıtady, kókónisterdi jyl boıy ósirýge múmkindik beredi. Tamshylap sýarylatyn qosymsha 5 gektar jerge kókónisterdi maýsymdyq ósirý uıymdastyrylady. Bul sýdy ysyrapsyz paıdalanýdyń tıimdiligin arttyrady», - dep habarlady Abaı oblysy ákimdiginen.
Úrjar aýdany Taskesken aýylynda asyl tuqymdy «Aqbas» iri qara malyn ósirý qolǵa alynbaq. Bul joba et óndirýdi arttyryp, jańa jumys oryndaryn ashady. Sondaı-aq kómir baǵasyn turaqtandyryp ári jergilikti turǵyndar úshin qolaıly jaǵdaı jasaıtyn qysqy otyn qoımasyn salý kózdelgen. Joba 2025 jylǵa josparlanǵan.
«Borodýlıha aýdanynyń Petropavlovka aýyldyq okrýginde uzyndyǵy 9 shaqyrym jolǵa ortasha jóndeý júrgizildi. Osy ýchaskede kóshe jaryǵy ornatylyp, aýyldaǵy ortalyq saıabaq abattandyryldy. Hokkeı korty da salyndy. Sonymen qatar aýylda jańa balalar oıyn alańy paıda boldy. Mektepke avtobýs satyp alyndy. Aýylishilik joldardyń 1 shaqyrymyna ınertti materıal tógildi. Qazirgi tańda qaraýsyz qalǵan jerlerdi qalpyna keltirý jumystary júrgizilýde», - delingen aqparatta.
Aqsýat aýdany Ekpin aýylynda klýbtyq úıler men az qamtylǵan otbasylarǵa arnalǵan jalǵa beriletin úıler salý úshin jobalar iske asyryldy. «Máýlit» sharýa qojalyǵy asyl tuqymdy «Aqbas» iri qara malyn ósirýmen aınalysady. Sharýashylyq 7 210 gektar jaıylym, 650 gektar shabyndyq, 1 000 gektar egistik jerge ıe. 2 000 bas iri qara, 1 000 qoı jáne 700 jylqysy bar. Bolashaqta ónimdi Qytaıǵa eksporttaý maqsatynda shaǵyn konservi tsehyn ashý kózdelgen.
Kókpekti aýdanynda sút ónimderin óndirý jolǵa qoıylyp jatyr. Sút fermasyn damytý nátıjesinde ónim kólemi kún saıyn 11 tonnadan 20 tonnaǵa deıin artady. Jumysshylar úshin tórt páterli jańa úı, balalar oıyn alańy salynbaq.
«Sarjal aýyldyq okrýginde qymyz óndirisi turaqty damyp keledi. Qazirgi tańda kún saıyn 100 lıtrge deıin qymyz óndiriledi. Búginde iri sýpermarkettermen kelisim sharttar jasaldy. Óndiris qýatyn táýligine 5 tonnaǵa deıin ulǵaıtý, qosymsha jabdyqtar satyp alý jáne ónimdi respýblıkalyq taýar aınalymyna shyǵarý josparlanýda. Bul jańa jumys oryndaryn qurýǵa múmkindik beredi», - delingen ákimdik málimetinde.
Óńir basshysy Nurlan Uranhaev aýdan ákimderine jobalardyń iske asyrylý barysyn qatań baqylaýdy, halyqpen jáne bıznes ókilderimen turaqty kezdesýler ótkizýdi tapsyrdy. Aýyldyq okrýgterdi damytý jónindegi Jol kartasy aýyl sharýashylyǵyn jaqsartýǵa, jańa jumys oryndaryn qurýǵa, ári halyqtyń ómir súrý sapasyn arttyrýǵa baǵyttalǵan. Sondyqtan zamanaýı tehnologııalardy qoldaný, ınvestıtsııa tartý aımaqtyń turaqty damýynda sheshýshi ról atqarady.
