Abaı oblysynda ákimdik qyzmetkerlerine azamattardyń ótinishterimen jumys isteýge qatysty semınar ótkizildi
SEMEI. KAZINFORM – Abaı oblysynda ákimdik qyzmetkerlerine azamattarmen tıimdi qarym-qatynas júrgizý jóninde oqytý ótti.
Abaı oblysynda azamattardyń ótinishterimen jumys isteý kezinde QR ákimshilik rásimdik-protsestik kodeksin qoldanýdyń ózekti máseleleri talqylanǵan semınar uıymdastyryldy.
Semınar jumysyna óńirdiń mamandandyrylǵan aýdanaralyq ákimshilik sotynyń ákimshilik basshysy Áıgerim Keńeshan, Ádilet departamentiniń ákimshilik bóliminiń basshysy Aıjan Qulmaǵambetova, oblys ákimi apparatynyń memlekettik-quqyqtyq bóliminiń bas ınspektory Indıra Naımanova, «Alikhan Bokeihan University» pedagogıka jáne psıhologııa kafedrasynyń aǵa oqytýshysy Nazgúl Rahymjanova, «Ulttyq aqparattyq tehnologııalar» AQ oblystyq ókildiginiń aqparattyq júıelerdi súıemeldeý basqarmasynyń basshysy Gúljan Serikbaeva qatysty.
Semınardyń maqsaty – qyzmetkerlerdi azamattarmen tıimdi qarym-qatynas jasaý, ÁRPK normalaryn túsindirý jáne «e-Ótinish» júıesimen jumys isteý boıynsha oqytý.
«Memleket basshysy Qasym-Jomart Toqaev Qazaqstan halqyna Joldaýynda búkil eldiń ortaq mindeti azamattardyń suranystaryna jedel ári tıimdi den qoıatyn «Halyq únine qulaq asatyn memleket» tujyrymdamasyn iske asyrý ekenin atap ótti. Bul semınar ótinishtermen jumys kezinde kvazımemlekettik sektor sýbektilerinde anyqtalǵan zańbuzýshylyqtar men kemshilikterdi joıý jónindegi is-sharalar josparyn oryndaý sheńberinde uıymdastyryldy», - dedi oblys ákimi apparaty basshysynyń orynbasary Anar Jakýpova.
Semınarda ÁRPK normalarynyń saqtalýy, memlekettik organdar men kvazımemlekettik uıymdarǵa kelip túsetin ótinishterdi tirkeý jáne esepke alý erejeleri talqylandy. Sondaı-aq qatysýshylar zań buzýshylyqtardy joıý boıynsha praktıkalyq usynystar alyp, ákimshilik organdardyń sheshimderine shaǵymdanýyna baılanysty sot praktıkasymen tanysty. Sonymen qatar halyqpen jumys kezindegi janjaldy jaǵdaılardy sheshý daǵdylary týraly dáris tyńdady.
Búginde Abaı oblysynda 10 679 ótinish tirkelgen, onyń ishinde 7 088-i ótinish, 477-i shaǵym, 1 126-y usynys jáne 1 988-i habarlama men suranys. Memlekettik organdardyń azamattardyń ótinishterimen jumysyna únemi taldaý júrgiziledi.
