Abaı oblysynda 50-den astam medıtsınalyq mekeme tek qaǵaz júzinde paıdalanýǵa berilgen

SEMEI. KAZINFORM – Ótken jyly óńir aýyldarynda 62 medıtsınalyq mekeme salynyp, paıdalanýǵa berý aktisi daıyn boldy. Alaıda osy kúnge deıin tek 10 mekeme aýdandyq aýrýhanalardyń qaramaǵyna berilgen.

Sebebi abattandyrý jumystary aıaqtalmaǵan, medıtsınalyq qural-jabdyqtar ornatylmaǵan. Jıhazdar da tolyq jetkizilmegen. Keıbir ǵımarattardyń shatyrynan sý aǵyp, ishki qabyrǵalary jaryla bastaǵan. 

Oblys ákimi Berik Ýálı halyq qanshama jyldan beri taǵatsyzdana kútip otyrǵan medıtsınalyq nysandardyń ýaqytynda paıdalanýǵa berilýin baqylamaǵany úshin salaǵa jaýapty orynbasary men Qurylys basqarmasynyń jumysyn synǵa aldy.

- Bul jaýaptylardyń salǵyrt jumysynyń nátıjesi dep sanaımyn. Ótken aptada Aıagóz aýdanyna barǵanymda birneshe aýyldyń turǵyny salynǵan medıtsınalyq nysandardyń qurylysyna shaǵymdaryn aıtty. Byltyr jyl sońynda qabyldanǵan ǵımarattar nege áli kúnge deıin iske qosylmaı otyr? Osyǵan jaýapty Qurylys basqarmasy qaıda qaraǵan? Bul – halyqqa qyzmet kórsetetin oryndar. Aýdan, aýyl ákimderi ǵımarattar sizderdiń aýmaqtaryńyzda bolǵandyqtan nysandy qabyldaý kezinde qadaǵalaýǵa alý kerek edi. Buǵan sizder de jaýaptysyzdar, - dedi aımaq basshysy.

Oblys ákimi olqylyqtardy joıý maqsatynda Qurylys basqarmasynyń mamandaryn qurylys júrgizilip jatqan árbir nysanǵa jaýapty retinde bekitip, kúndelikti baqylaý jasaýdy tapsyrdy.

Eske salsaq, osyǵan deıin Abaı oblysynda 753,1 myń gektarǵa aýyl sharýashylyǵy daqyldary egilgeni jaıly jazǵanbyz.