Abaı oblysynda 159,9 myń sharshy metr turǵyn úı paıdalanýǵa berildi
ASTANA. KAZINFORM — Búginde oblys boıynsha 30 myńǵa jýyq adam turǵyn-úı kezeginde tur. Óńir turǵyndaryn baspanamen qamtý týraly tolyǵyraq oblys ákimi Berik Ýálı baıandap berdi.
— Jyl basynan oblys boıynsha qurylys jumystarynyń kólemi 194 mlrd teńgeni qurady, 159,9 myń sharshy metr turǵyn úı paıdalanýǵa berildi. Halyqtyń áleýmettik osal tobyn turǵyn úımen qamtý úshin bıyl 1 146 jalǵa beriletin páter satyp alýǵa 23,3 mlrd teńge bólindi. Búginge qala men aýdan ákimdikteri 213 páter satyp aldy. Sonymen qatar, Semeı qalasynyń Qaraǵaıly yqsham aýdanynda bıyl 21,6 myń sharshy metr 4 nesıelik turǵyn úı (280 páter) paıdalanýǵa berildi, taǵy 13 úı qurylysy júrgizilip jatyr (776 páter), — dedi Berik Ýálı ortalyq kommýnıkatsııalar qyzmeti alańynda óńirdiń 9 aı ishindegi áleýmettik-ekonomıkalyq damýy týraly esep bere turyp.
Oblys basshysy keltirgen málimetke súıensek, búginde turǵyn-úı kezeginde 30 myńǵa jýyq adam tur, onyń ishinde Semeı qalasy boıynsha — 20,5 myń adam.
— Osy máseleni sheshý úshin qalanyń tarıhı ortalyǵyndaǵy ınfraqurylymnyń tozýyn, jańa qurylys úshin bos alańdardyń tapshylyǵyn eskere kele, ákimshilik-iskerlik ortalyqty ornalastyra otyryp, jańa turǵyn aýdanyn qurý usynyldy. Bul Semeı qalasyndaǵy ıakorlyq joba bolyp, óńirdiń ósýi men ýrbanıstıkalyq damýynyń jańa qozǵaýshy kúshine aınalady. Turaqty jumys oryndary ashylyp, óńirge qomaqty ınvestıtsııa tartylady. Baspana kezegin azaıtyp, halyqtyń suranysyn qamtamasyz etý maqsatynda Semeı qalasynyń bas josparyna túzetýler engizilip jatyr, — deıdi óńir ákimi.
Aıta ketsek, Semeıde jańa jylý elektr ortalyǵyn salý boıynsha jedel jumys toby quryldy.
Abaı oblysynda jyl sońyna deıin 10 aýyl ınternetke qosylady.
Sondaı-aq Berik Ýálı Semeıde ónerkásip óndirisin keńeıtýge 500 gektar jer bólinetinin málim etti.
Belgili bolǵandaı jyl sońynda deıin Abaı oblysynda 255 jumys ornymen qamtıtyn 7 joba júzege asyrylady.
Sonymen qatar oblys ákimi Alakóldiń týrıstik jáne ınvestıtsııalyq áleýetine qatysty túsinik berdi.
Buǵan deıin habarlaǵanymyzdaı bıyl Abaı oblysynda ınvestıtsııa tartý 103,1 paıyzǵa ósken.