Abaı oblysynda 10 sotyq jer alý úshin kezekte qansha adam tur

Memleketten jeke turǵyn úı salý maqsatynda beriletin 10 sotyq jer boıynsha óńirdegi ahýaldy bilý úshin Kazinform tilshisi Abaı oblysynyń Sáýlet, qala qurylysy jáne jer qatynastary basqarmasyna saýalhat joldady.

— 2025 jyly oblys boıynsha jeke turǵyn úı qurylysy úshin 546 azamatqa 10 sotyq jer ýchaskesi berildi. Al 2026 jyldyń basynan beri 70 azamat jer aldy. 2022 jyly elektrondy kezek júıesi engizilgeli beri óńirde jalpy sany 2841 azamatqa jer ýchaskesi tabystaldy, — dep jaýap berdi basqarma basshysynyń orynbasary Berik Muhanov.

Qazirgi tańda oblys boıynsha 10 sotyq jer alýǵa kezekte shamamen 41 myń adam tur.

Ortasha kútý merzimi óńirdegi jer qory men ınfraqurylymnyń daıyndyq deńgeıine baılanysty shamamen 10-15 jyl.

Jer ýchaskeleri Semeı qalasy, Aıagóz jáne Úrjar aýdandarynda eń kóp berilip jatyr. Bul eldi mekenderde jańa turǵyn alaptaryn damytý jumystary kezeń-kezeńimen júrgizilip jatyr.

— Qazir jer ýchaskeleri negizinen ınjenerlik ınfraqurylym júrgizilgen aýmaqtardan berilip jatyr. Atap aıtqanda, sý, elektr jelisi jáne jol máselesi sheshilgen jer telimderine basymdyq beriledi. Sondaı-aq Abaı oblysynda paıdalanylmaǵan jáne zań talaptaryna sáıkes rásimdelmegen jerlerdi memleketke qaıtarý jumystary júrgizilip jatyr. 2025 jyly 10 myń gektardan astam jer memleket menshigine qaıtaryldy, — deıdi Berik Muhanov.

Onyń aıtýynsha, jer bólý protsesi tolyq tsıfrlandyrylǵan. Azamattar jer kezegine eGov portaly arqyly onlaın turyp, ótinish mártebesin baqylaı alady.

— 2026 jyldyń sońyna deıin Abaı oblysynda ınfraqurylym daıyn bolǵan aýmaqtar boıynsha qosymsha jer ýchaskelerin berý josparlanyp otyr. Naqty kórsetkish ınjenerlik-kommýnıkatsııalyq jumystardyń aıaqtalýyna baılanysty aıqyndalady, — deıdi oblystyq Sáýlet, qala qurylysy jáne jer qatynastary basqarmasy basshysynyń orynbasary.

Eske salsaq, osyǵan deıin Almatyda 10 jer telimi memleket muqtajyna alynatyndyǵy habarlanǵan.