Abaı oblysy syrtqy saýdany jáne halyqaralyq jolaýshylar tasymalyn damytýdy kózdeıdi
SEMEI. KAZINFORM — Abaı oblysynyń delegatsııasy Qazaqstan men Qytaı shekarasyndaǵy QHR Shyńjań-Uıǵyr avtonomııalyq aýdany Tarbaǵataı okrýginiń basshylyǵymen kezdesti.
Sapardyń maqsaty – óńirler arasyndaǵy ekijaqty qatynastardy nyǵaıtý máselelerin talqylaý. Delegatsııa quramynda oblys ákimi, Abaı oblysynyń Memlekettik kirister departamentiniń basshysy, shekara qyzmeti, Semeı qalasynyń halyqaralyq áýejaıynyń dırektory bar.
Abaı oblysynda eki el arasyndaǵy tranzıttik torap retinde óńirimizdiń áleýetin ashýǵa baǵyttalǵan arnaıy «Jol kartasy» bekitilip, belsendi iske asyrylyp jatyr. Shyńjań-Uıǵyr avtonomııalyq aýdany men Abaı oblysy arasynda áýe reısterin engizý josparlanǵan. Bul ınfraqurylymdy jaqsartýǵa jáne ózara ekonomıkalyq qatynastardy nyǵaıtýǵa yqpal etedi. Osy turǵyda Semeı qalasyndaǵy Halyqaralyq áýejaıynyń róli mańyzdy ról atqarady.
Sondaı-aq, Qazaqstannyń ishki ınfraqurylymyn, ıaǵnı áýe, temirjol jáne avtomobıl joldaryn nyǵaıtý sharalary qabyldanýda. Alakól kóliniń týrıstik áleýetin eskere otyryp, Úrjar aýdanyndaǵy áýejaı ushaqtardy qabyldaýǵa daıyn. Osy arqyly jolaýshylar aǵyny artady dep josparlanǵan.
«Abaı oblysy eki el arasyndaǵy yntymaqtastyqty nyǵaıtýǵa jáne saýda-ekonomıkalyq baılanystardy damytýda «altyn kópir» bolýǵa áleýmeti zor.. Osy rette, Baqty ótkizý pýnktindegi qaıta jańartý jumystaryna baılanysty, kedergisiz halyqaralyq jolaýshylar aǵyny men syrtqy saýda úshin ýaqytsha ótkizý pýnkterin ashý múkindigin qarastyrýǵa múddelimiz. Oǵan óz tarapymyzdan tıisti qoldaý kórsetemiz. Bizdiń de kózdegenimiz tıimdi ınvestıtsııalyq orta qalyptastyryp, jańa jobalardyń júzege asýyna jan-jaqty kómek kórsetý», - dep atap ótti Nurlan Uranhaev.
«Aıagóz-Tachen» temirjol marshrýttary arqyly, sondaı-aq qurǵaq port pen Ertis ózenin paıdalaný arqyly Qytaımen kólik baılanystaryn ornatý jónindegi jobalar óńirdiń tranzıttik áleýetin nyǵaıtýǵa baǵyttalǵan.
