Abaı oblysy Polıtsııa departamentiniń bastyǵy aýysty
SEMEI. KAZINFORM — Eldar Danııarov endi Abaı oblysy Polıtsııa departamentine jetekshilik etedi, dep habarlaıdy oblys ákimdiginiń baspasóz qyzmeti.
Búgin QR Іshki ister mınıstriniń orynbasary Aıdar Saıtbekov Abaı oblysy Polıtsııa departamentiniń jańa bastyǵyn tanystyrdy.
Bul qyzmetke buǵan deıin Astana qalasy Polıtsııa departamenti bastyǵynyń birinshi orynbasary bolǵan polıtsııa polkovnıgi Eldar Nurlanuly Danııarov taǵaıyndaldy.
Tanystyrý sharasyna qatysqan oblys ákimi Berik Ýálı Polıtsııa departamentiniń jańa bastyǵynyń aldaǵy jumysyna sáttilik tiledi.
— Memleket basshysy Qasym-Jomart Kemeluly Toqaev qoǵamdyq tártip pen qaýipsizdikti qamtamasyz etýge, azamattardyń quqyǵy men bostandyǵyn qorǵaýǵa árdaıym aıryqsha kóńil bóledi. Prezıdentimiz «Zań men tártip» qaǵıdatyn qatań ustanýdy memleket turaqtylyǵy men halyqtyń ál-aýqatynyń negizgi kepili retinde aıtyp keledi. Abaı oblysynda da bul baǵytta júıeli jumys júrgizilip keledi. Polıtsııa qyzmetkerleriniń tynymsyz eńbeginiń arqasynda óńirde qoǵamdyq tártip pen qaýipsizdik ahýaly turaqty deńgeıde saqtalyp otyr. Polıtsııa departamentiniń jańa bastyǵy Eldar Nurlanuly óz qyzmetinde abyroıly eńbek etip, Abaı oblysynyń turǵyndarynyń senimin aqtaıdy dep senim artamyz. Sizder jergilikti atqarýshy organdarmen birlese otyryp, qylmystyń aldyn alý, qoǵamdyq tártipti saqtaý, azamattardyń quqyqtary men qaýipsizdigin qorǵaý baǵytynda naqty nátıjelerge qol jetkizesizder dep úmittenemin. Oblys ákimdigi óz kezeginde polıtsııa qyzmetkerlerimen árqashan tyǵyz qarym-qatynasta jumys isteýge daıyn. Basty maqsatymyz — turǵyndarymyzdyń tynyshtyǵy men ómir sapasyn qamtamasyz etý. Osydan bir aı buryn ótken Uly Abaıdyń 180 jyldyq mereıtoıy kezinde osy tártip saqshylary belsendi jumys istedi. Osy múmkindikti paıdalanyp oblys halqy atynan alǵysymdy bildirgim keledi, — dedi aımaq basshysy.
Osyǵan deıin Qyzylorda oblystyq kásipkerlik basqarmasynyń basshysy taǵaıyndalǵany týraly jazǵan edik.