Abaı oblysy ákiminiń orynbasary taǵaıyndaldy
ASTANA. KAZINFORM — Dýman Ospanov Abaı oblysy ákiminiń orynbasary boldy, dep habarlaıdy oblys ákimdiginiń baspasóz qyzmeti.
— Prezıdent Ákimshiliginiń kelisimimen, Abaı oblysynyń ákimi Berik Ýálıdiń ókimimen 2025 jyldyń 3 qazanynan bastap Dýman Ryspekuly Ospanov oblys ákiminiń orynbasary laýazymyna taǵaıyndaldy, — delingen habarlamada.
Aımaq basshysy búgin ony oblys aktıvine tanystyrdy.
Dýman Ryspekuly Ospanov 1979 jyly Abaı oblysy Maqanshy aýdanynyń Maqanshy aýylynda dúnıege kelgen.
2000 jyly Semeı qalasyndaǵy Shákárim atyndaǵy memlekettik ýnıversıtetti «Qarjyger-ekonomıst» mamandyǵy boıynsha, 2006 jyly Qazaq quqyqtaný jáne halyqaralyq qatynastar ınstıtýtyn «Zańger» mamandyǵy boıynsha támamdaǵan.
Eńbek jolyn 2001 jyly «Naýryz bank Qazaqstan» AQ-da bastady. Ár jyldary bank sektorynda, «Astana-Fınans» AQ, «Óńirlik ınvestıtsııalyq ortalyǵy» JShS, «Aýyl sharýashylyǵyn qarjylaı qoldaý qory» AQ jáne «Agrarlyq nesıe korporatsııasy» AQ-da túrli basshylyq laýazymdarda qyzmet atqardy.
2022 jyldan bastap osy taǵaıyndaýǵa deıin «QazAgroFınans» AQ basqarýshy dırektory boldy.
Budan buryn Sultanǵalı Kenjequlov «KAZAKH INVEST» UK» AQ basqarma tóraǵasy atanǵanyn jazǵanbyz.