Abaı medet tutqan Sáıhalı kim?
PAVLODAR. KAZINFORM - Qazaqtyń uly aqyny Abaı Qunanbaıuly medet tutyp, óleńderin oqyǵan shyǵys aqyny Sabyr Sáıhalıdiń 1905 jyly jaryq kórgen óleńder jınaǵy tanystyryldy. Týyndy 296 betten turady.
Pavlodarda shyǵys aqyny Sabyr Sáıhalıdiń 1905 jyly Qazan qalasynda arab grafıkasynda jaryq kórgen kóne kitaby tanystyryldy.
Kitapty qurastyrǵan - Ismaıl Shamsýdınov. Kitaptyń ataýy – «Dıýanı Sáıhalı». Týyndy 296 betten turady. Bul kitapta dinı-tarıhı uzaq jyr jazylǵan. Dúnıeniń jaralýynan bastap, 680 jylǵy Husaıynnyń Kerbala shólinde soǵysyp ólgenine deıngi tarıh qamtylǵan. Tarıhı jyrdyń avtory - shyǵys aqyny Sabyr Sáıhalı.
Sabyr Sáıhalıdyń esimi Abaı óleńinde atalady.
«Fzýlı, Shamsı, Sáıhalı,
Naýaı, Saǵdı, Fırdaýsı,
Qoja Hafız bý hamması,
Mádet ber, ıá, shaǵırı[1] farııad[2]».
Belgilengen sózderdiń túsinigi kelesideı:
[1] - Shaǵırı (arabsha) – aqyn.
[2] - Fárııad (parsysha) – teńdesi joq, asyl.
Demek, Abaı Qunanbaıuly shyǵystyń teńdesi joq aqyndarynan medet suraǵan bolsa, sol medet (bata) suraǵan shyǵys aqyndarynyń biri - Sáıhalı aqyn.
Ǵalamtordaǵy Vıkıpedııa málimetterine súıensek, Sabyr Sáıhalı 15-ǵasyrda ómir súrgen shyǵys aqyny. «Dıýanı Sáıhalı» kitaby 1332 jyly Tashkentte, keıin Qazan men Stambýl qalalaryndaǵy baspadan shyqqan.
Óleńder jınaǵynyń bir nusqasy Pavlodar oblysynda tabylyp otyr. Bul kitaptyń birneshe nusqasy Almaty oblysyndaǵy Ulttyq kitaphanada saqtalsa, taǵy bir nusqasy Abaı oblysyndaǵy Abaı mýzeıinde tur. Abaı mýzeıine Qaıym Muhamedhanov tapsyrǵan. Sırek kitap Abaıdyń týǵan kúnine oraı, Buqar jyraý atyndaǵy ádebıet jáne óner mýzeıinde kópshilik qaýymǵa tanystyrdy.
Jádigerdi Pavlodar qalasynyń turǵyny Qalıpa Úkenqyzy tabystady.
Buǵan deıin Pavlodardaǵy mýzeıde Abaı Qunanbaıulynyń 1909 jyly jaryq kórgen tuńǵysh jyr jınaǵy saqtalyp turǵany týraly jazǵan edik.
