Abaı oblysynyń teatrlary eki birdeı halyqaralyq baıqaýda top jardy
SEMEI. KAZINFORM — Abaı atyndaǵy teatr quramynda búginde úsh birdeı ujym (Abaı atyndaǵy qazaq mýzykalyq drama teatry, F.M.Dostoevskıı atyndaǵy orys drama teatry, «Darıǵa-aı» jastar teatry) bar. Muny Býrabaıda ótken Ulttyq quryltaıdyń kezekti otyrysynda Memleket basshysy Qasym-Jomart Toqaev: «Semeıde bir ǵımaratta úsh birdeı teatr syǵylysyp otyr. Ásirese, aımaqtarda teatrlardy salýǵa jáne damytýǵa basa nazar aýdarý kerek» dep atap ótken bolatyn.
Osyǵan qaramastan teatr ujymdary bıik deńgeıde óner kórsetip, joǵary jetistikterge qol jetkizýde. 12-16 qyrkúıek aralyǵynda Ulytaý oblysy Jezqazǵan qalasynda ótken J.Hadjıev atyndaǵy IV halyqaralyq teatr festıvalinde Abaı atyndaǵy qazaq mýzykalyq drama teatrynyń quramyndaǵy «Darıǵa-aı» jastar teatry tabysty óner kórsetip, Oralhan Bókeıdiń «Óz otyńdy óshirme» spektaklimen bas júlde jáne «Úzdik spektakl» nomınatsııasyna ıe boldy.
Bul jeńis – jas ujymnyń kásibı sheberliginiń, tynymsyz eńbeginiń jáne ónerge degen adaldyǵynyń jarqyn dáleli.
Al keshe Taldyqorǵan qalasynda ótip jatqan «BIKEN FEST» III halyqaralyq teatr festıvalinde Abaı atyndaǵy qazaq mýzykalyq drama teatry sahnalaǵan «Abaı aıtqan «Eńlik – Kebek» spektakli bas júldeni jeńip aldy.
Búginde teatrda 7 Mádenıet qaıratkeri, 17 Mádenıet salasynyń úzdigi tósbelgisimen marapattalǵan, jıyny 66 qyzmetker eńbek etip keledi. Abaı atyndaǵy teatr bıylǵy 8 aıda 22 qoıylym qoıdy, onyń ekeýi premera.