#Abai175: Ereımentaý aýdanynyń ákimi «Kózimniń qarasy» ánin oryndady

KÓKShETAÝ. QazAqparat – Uly Abaıdyń 175 jyldyǵyna arnalǵan estafetany Aqmola oblysy Ereımentaý aýdanynyń ákimi Abaı Áljanov qoldady. Bul týraly ákim óziniń áleýmettik jelidegi paraqshasynda jarııalady, dep habarlaıdy QazAqparat tilshisi.

«Uly Abaı Qunanbaev babamyzdyń 175 jyldyǵyna oraı, osy mańyzdy ataýly kúnge, jylnamaǵa arnap, sizderdiń nazarlaryńyzǵa qazaq dalasynyń Uly aqyny, dana oıshyly, qazaqtyń jańa tarıhı dáýirindegi jazba ádebıetiniń ǵulama atasy shyǵarmalarynyń óleń joldaryn joldaǵym keledi.

Abaı esimi qazaq halqynyń ulttyq sanasynyń oıanýy men rýhanı jańǵyrýynyń sımvoly ekeni sózsiz. Óleńin ánmen órnektegen aqyn shyǵarmalaryn oqı otyryp, biz onyń adam jany men ýaqyt talabyn jete túsingen daryn ıesi bolǵanyna kóz jetkizemiz», dedi Ereımentaý aýdanynyń ákimi Abaı Áljanov beınejazbada.

Budan keıin ákim Uly Abaıdyń «Kózimniń qarasy» óleńin dombyramen naqyshyna keltirip oryndap berdi.

Sonymen qatar, Abaı Áljanov estafeta tizginin Atbasar aýdanynyń ákimi Amanbek Qaljanov pen Sandyqtaý aýdanynyń ákimi Asqarbek Úısinbaevqa beretinin aıtty.

Ákimniń beınejazbasyna pikir qaldyrǵan jeli qolanýshylardyń kóbi Abaı Áljanovtyń ulttyq ónerge degen janasharlyǵyn aıtyp, Uly Abaıdyń 175 jyldyǵyna oraı respýblıka boıynsha qolǵa alynǵan estafetany qoldaǵany úshin alǵystaryn bildirýde.