«Abai akademiasy» entsıklopedııalyq portaly ashyldy
SEMEI. KAZINFORM — Abaı oblysynda Abaıdyń 180 jyldyǵyna arnalǵan onkúndik mereıtoılyq sharalar bastaldy. Búgin Semeı qalasyndaǵy Muhtar Áýezov atyndaǵy pedagogıkalyq kolledjdiń «Es-Aımaq» rýhanı ortalyǵynda «Abai akademiasy» atty entsıklopedııalyq portaldyń tusaýkeseri ótti.
Abaı shyǵarmashylyǵyna arnalǵan tuńǵysh entsıklopedııalyq portaldyń tanystyrylymyna oblys ákimi Berik Ýálı, zııaly qaýym ókilderi, abaıtanýshy ǵalymdar qatysty.
«Abai akademiasy» jobasynyń jetekshisi Aıjan Tábarakqyzy jınalǵandarǵa portaldy tanystyrdy.
«Abai akademiyasy» portaly — Abaı murasyn óskeleń urpaqqa nasıhattaıtyn, aqyn týraly tolyq málimet usynatyn ǵylymı-tanymdyq derekkóz. Platformada aqynnyń ádebı, ǵylymı, pýblıtsıstıkalyq jáne epıstolıarlyq eńbekteri tekstologııalyq saraptamamen, túrli formatta jınaqtalǵan. Materıaldar Abaı ınstıtýttary, ǵylymı ortalyqtar, arhıvter men murajaılardan alynyp, tsıfrly túrde engizilgen. Sondaı-aq tele-radıo habarlar men derekti fılmder de qamtylǵan.
Entsıklopedııalyq portaldyń tusaýkeserinde sóz sóılegen aımaq basshysy Abaı toıy bıyl tuńǵysh ret 10 kúndik retinde atap ótiletinin aıtyp, 1-10 tamyz aralyǵynda Semeı qalasy men Abaı, oblystyń ózge de aýdandarynda túrli mádenı-rýhanı, tanymdyq, ıntellektýaldyq is-sharalardyń josparlanyp otyrǵanyna toqtaldy.
«Atap ótý kerek, atalǵan 10 kúndiktiń ótýine qarjyny túgeldeı janashyr demeýshiler kóterip otyr. Abaı toıynyń óńirimizge eń basty syılyǵy — Memleket basshysynyń qoldaýymen bastalǵan „Abaıǵa qurmet“ aktsııasy. Hakimniń toıynda elimizdiń ár óńiri jańadan qurylǵan oblysymyzǵa bir nysannan salyp beretin boldy. Mańǵystaý „Dostyq úıin“, Shymkent shyǵarmashylyq ortalyq, Túrkistan kórme ortalyǵyn, Astana Jaıly mektep, Aqtóbe jekpe jek ortalyǵy, Pavlodar oblysy Ústel tennıs ortalyǵyn salýǵa, Shyǵys Qazaqstan Ertis jaǵalaýyn jasap beremiz dep otyr. Ózge óńirler de habarlasyp, yqylas-nıetterin bildirip jatyr» dedi oblys ákimi.
Entsıklopedııalyq portaldyń Abaı murasyn zamanaýı formatta jetkizý turǵysynda mańyzdy ekenin atap ótti.
— Memleket basshysy Qasym-Jomart Kemeluly Toqaev «Abaı jáne 21 ǵasyrdaǵy Qazaqstan» atty maqalasynda «Abaıdyń shyǵarmalaryna zer salsaq, onyń únemi eldiń alǵa jyljýyna, ósip-órkendeýine shyn nıetimen tileýles bolǵanyn, osy ıdeıany barynsha dáriptegenin baıqaımyz. Al, ilgerileýdiń negizi bilim men ǵylymda ekenin anyq bilemiz. Abaı qazaqtyń damylsyz oqyp-úırengenin bar jan-tánimen qalady. ‚Ǵylym tappaı maqtanba‘ dep, bilimdi ıgermeıinshe, bıikterdiń baǵyna qoımaıtynyn aıtty» dep Abaıdyń muratyn, maqsaty men armanyn jiliktep aıtyp, búgingi qazaq balasyna oı salǵan bolatyn. Demek, búgin kópke jol tartatyn Abaıǵa arnalǵan entsıklopedııalyq portal, hakim muralaryn óskeleń urpaqqa nasıhattaý jolynda negizgi baǵdarsham bolmaq. Sondaı-aq Abaı týraly aqparat izdegen adam «Abai akademiyasy» portaly arqyly tolyqqandy qol jetkize alady, — dedi aımaq basshysy.
Shara barysynda abaıtanýshy Arap Espenbetov, «Jıdebaı-Bórili» mýzeı-qoryǵynyń dırektory Ulan Saǵadıev, ádebıettanýshy, PhD doktory Qarlyǵash Áýbákir entsıklopedııalyq portal týraly pikirlerin aıtty.
— Búgin ashylyp otyrǵan «Abai akademiasy» entsıklopedııalyq portaly — ǵylymı, mádenı, aqparattyq ortadaǵy buryn-sońdy bolmaǵan erekshe qubylys dep aıtýǵa tolyq negiz bar. Elektrondyq portal bárimizge ortaq. Ol jas ǵalymǵa da, izdenýshige de, stýdentke de, oqýshyǵa da, qarapaıym jumysshyǵa da ortaq. Óziniń dosy sııaqty áńgimelesip, qajetti derekterin qabyldap, ary qaraı óziniń uly aqyn týraly oılary men qarymdaryn damytatyny sózsiz. Abaıdy bilemin, tanımyn, uǵamyn, túsinemin deıtin jannyń barlyǵyna kómek beretin, eń úlken basty qural, entsıklopedııa, — dedi Arap Espenbetov.
Búgin onkúndik aıasynda Semeıdegi Beıbitshilik aralynda etnoaýyl qalashyǵy, belgili sýretshi Ańsaǵan Mustafanyń «Kóńilge túrli oı salar» atty kórmesi ashylady. «Arena» mádenı-sport kesheninde «Adamzattyń alyby — hakim Abaı» atty mereıtoılyq gala-kontsert ótedi.