A gepatıti 70 paıyz turmystyq jaǵdaıda juǵady - sanıtarlyq dáriger
ALMATY. KAZINFORM – Almatyda byltyr A gepatıtin juqtyrǵan adamdardyń sany birshama kóbeıgen.
Almaty qalasynyń sanıtarııalyq-epıdemıologııalyq baqylaý departamentiniń basshysy, megapolıstiń bas sanıtarlyq dárigeri Qasymhan Alpysbaıulynyń aıtýynsha, A vırýstyq gepatıtin juqtyrýdyń kórsetkishi ósken. 2024 barlyǵy 495 jaǵdaı tirkelse, 2023 jyly 370 jaǵdaı bolǵan.
- Vırýstyq gepatıt A – baýyrdy zaqymdaıtyn jedel vırýsty aýrý. A gepatıtinde ınkýbatsııalyq kezeń 7 kúnnen 50 kúnge deıin (ortasha 35 kún) sozylady. Aýrý eresek turǵyndar arasynda basym, onyń úlesi – 74,3%, 14 jasqa deıingi balalar arasynda – 25,6%, jasóspirimder arasynda – 8,2%, - dedi ol.
Almatynyń bas sanıtarlyq dárigeri naýqastardan alynǵan saýalnamaǵa sáıkes, ınfektsııanyń negizgi taralý joly turmystyq qarym-qatynas ekenin atap ótti - 70,7% (350 jaǵdaı). Odan bólek 25,5% (126 jaǵdaı) sapasyz jýylǵan kókónister men jemisterdi tutyný saldarynan jáne 3,8% (19 jaǵdaı) ashyq sý qoımalarynda, onyń ishinde shetel men qala syrtynda shomylý kezinde juǵady.
- Búgingi kúni A vırýstyq gepatıtiniń eń tıimdi aldyn-alý ádisi - vaktsınatsııa. A gepatıtine qarsy ekpe josparly túrde eki ret 2 jastaǵy balalarǵa jáne epıdemıologııalyq kórsetkish boıynsha naýqaspen qarym-qatynasta bolǵan, buryn josparly túrde egilmegen 14 jasqa deıingi balalarǵa turǵylyqty meken-jaıy boıynsha emhanalarda tegin júrgiziledi, - dedi Qasymhan Alpysbaıuly.
Eske salaıyq, buǵan deıin qyzylsha juqtyrǵan balalardyń 83 paıyzy ekpe almaǵanyn jazǵanbyz.