97 paıyzdan astam aýyl ákimderi saılaý arqyly taǵaıyndaldy
ASTANA. KAZINFORM — 97 paıyzdan astam aýyl ákimderi saılaý arqyly taǵaıyndaldy. Bul týraly Ortalyq kommýnıkatsııalar qyzmetindegi brıfıngte Ulttyq ekonomıka vıtse-mınıstri Baýyrjan Omarbekov aıtty.
— Memleket basshysynyń tapsyrmasyna sáıkes, elde aýyldyq okrýg ákimderin tikeleı saılaý júıesi engizildi. 2021-2024 jyldary 2 641 ákim saılandy. Olardyń 70 paıyzdan astamy bul laýazymǵa alǵash ret keldi. Jalpy alǵanda, 97 paıyzdan astam aýyl ákimderi saılaý arqyly taǵaıyndaldy, — dedi Baýyrjan Omarbekov.
Budan bólek, vıtse-mınıstr Prezıdent janyndaǵy Memlekettik basqarý akademııasy men «Amanat» partııasy Ulttyq ekonomıka mınıstrliginiń qoldaýymen qalalar, aýyldar men kentter ákimderin qaıta daıarlaý baǵdarlamasyn ázirlegenin aıtty.
— Baǵdarlamanyń negizgi maqsaty — jergilikti ózin-ózi basqarý máselelerin tıimdi sheshý, ákimderdiń kásibı jáne basqarýshylyq quzyrettiligin arttyrý arqyly óńirlerdiń turaqty áleýmettik-ekonomıkalyq damýyn qamtamasyz etý. Oqý qorytyndysy boıynsha qatysýshylar aýyldyq okrýgterdiń ekonomıkalyq damýynyń baǵdarlamalaryn ázirleıdi. Qazirgi ýaqytta baǵdarlama aıasynda 17 óńirden 1 815 aýyl ákimi bilim alyp jatyr, — dedi ol.
Taıaýda Býrabaıda ótken Ulttyq quryltaıdyń IV otyrysynda Memleket basshysy Qasym-Jomart Toqaev bıyldan bastap barlyq aýdan ákimderin halyq tikeleı saılaıtynyn aıtqan edi.