90 jastaǵy qarııa álemdegi eń qart júk kóliginiń júrgizýshisi atandy

ASTANA. KAZINFORM – AQSh-tyń 90 jastaǵy turǵyny Doıl Archer Gınnestiń rekordtar kitabyna enip, álemdegi eń qart júk kóliginiń júrgizýshisi atandy.

UPI málimetinshe, Kanzas shtatynyń qart turǵyny 60 jyldan astam ýaqyt boıy júk kóligin tizgindeıdi eken. AQSh barlyq shtatyn aralap, mıllıondaǵan shaqyrymdy júrip ótken. 

Júk kóliginiń júrgizýshisi óz esiminiń tarıhta qalǵanyna qýanyp, «zeınetke shyǵý» degen tirkes sózdik qorynda múldem joq ekenin ázilmen jetkizdi.

«Men jaqyn arada zeınetke shyǵýdy josparlamaımyn. Densaýlyǵym syr bermese, kólik júrgizýdi jalǵastyramyn», - deıdi 90 jastaǵy qarııa.

Archer eńbek jolynda tasymaldaýǵa bolatyn júkterdiń barlyq túrin dittegen jerge aparǵanyn aıtady. Onyń týystary Archerdiń jumysyna degen adaldyǵy jastarǵa jiger beretinine senimdi.