9 synyp oqýshysy Sırııaǵa ketpek bolǵan
Jasóspirimdi raıynan qaıtarýǵa kúsh salǵan teolog, dintanýshy, Nur Múbárak Egıpet Islam mádenıeti ýnıversıtetiniń doktoranty, respýblıkalyq aqparattyq nasıhat tobynyń múshesi Serik Enshibaı osy oqıǵany aıtyp berdi.
«Men «Shapaǵat» úkimettik emes uıymynda eńbek etip júrgenimde meshit ımamy shaqyrdy. Barsam, Sırııaǵa ketpek bolǵan 9 synyp oqýshysymen kezdesýge shaqyrǵan eken. Áńgimeden baıqaǵanymdaı, bala ózi «Sırııaǵa ketkim keledi» dep áleýmettik jelide jazba qaldyrǵan. Artynsha oǵan birneshe adam baılanysqa shyqqan. Telefon nómirin surap, sheteldik tólqujat jasaý, jolǵa jumsalatyn qarajat, kimderden qaryz suraý kerek, ne dep aıtý kerek degen sııaqty keńes bergen. «Qaıda ketetinińdi ashyq aıtpa, Mysyrǵa oqýǵa ketemin de» dep úıretken. Oqýshy endi ketemin dep júrgende meshitte ımamdardyń ýaǵyzyn estigen. Áli oı-sanasy qalyptaspaǵan jasóspirim bala ımamnyń «Sırııaǵa barmańyzdar, ol jaqta musylmanshylyqtyń ıisi de joq, ol jaqta ıslam dinin saıasat quraly retinde paıdalanady» degen ýaǵyzynan oılanyp baryp, ımamǵa jolyqqan», - dedi Serik Enshibaı.
Oqýshymen teolog, psıholog mamandar birneshe ret kezdesken.
Psıhologtardyń pikirinshe, balanyń mıy teris aǵymǵa ýlanbaǵan.
«Balada dinı túsinik joq. Sanasy ýlanbaǵan. Salafızm, ýahabızm sııaqty aǵymdardan habary joq. Ata-anasy ajyrasqan bolyp shyqty. Anasy basqa bireýge kúıeýge tıgen. Bálkim jalǵyzdyqtan ba, bálkim bir ómirine ózgeris engizgisi keldi me, áıteýir Sırııaǵa ketem dep bel býǵan. «Men sharshadym. Otbasynda jylý joq» degen jaýap aldyq», - dedi teolog.
9 synyp oqýshysy kúızeliske túsip janyna jeleý bolatyn jan taba almaı júrgende áleýmettik jeliden, ınternetten Sırııadaǵy baqytty ǵumyr týraly rolıkter kórgen.
Bul oqıǵadan soń teologtar men psıhologtar balanyń ata-anasymen birneshe márte kezdesip, áńgime-dúken qurǵan. Nátıjesinde oqýshy qoǵamǵa beıimdelip, áleýmettik ortaǵa oraldy.
