9 shilde. QazAqparat kúntizbesi
ATAÝLY KÚNDER
Qazaqstanda sý sharýashylyǵy qyzmetkerleri kúni
Qazaqstannyń kásibı oqıǵalar kúntizbesindegi eń jańa merekelerdiń biri Qazaqstan Respýblıkasy Úkimetiniń 2019 jylǵy 24 qańtardaǵy № 11 qaýlysymen bekitildi. Sý sharýashylyǵy qyzmetkerleriniń kúnin engizý maqsaty – halyq pen ekonomıka salalaryn sý resýrstarymen qamtamasyz etýge qomaqty úles qosatyn, sý sharýashylyǵy obektileriniń senimdi jumysyn qoldaıtyn, Qazaqstannyń tabıǵı baılyqtaryn saqtaýǵa jáne kóbeıtýge kómektesetin sý sharýashylyǵynyń barlyq qyzmetkerine qurmet kórsetý.
Qazaqstanda balyq sharýashylyǵy qyzmetkerleri kúni
Resmı túrde 2017 jyly bekitilgen («Qazaqstan Respýblıkasyndaǵy merekeler týraly» 2001 jylǵy 13 jeltoqsandaǵy Qazaqstan Respýblıkasy Zańynyń 4-babyna sáıkes Qazaqstan Respýblıkasynyń Úkimeti balyq sharýashylyǵy qyzmetkerleriniń kúnin shildeniń ekinshi jeksenbisinde atap ótýge qaýly etti).
Bul ataýly kúndi balyq sharýashylyǵy qyzmetkerleri, kásibı ózen jáne teńiz balyq aýlaýshylary, balyqshy-sportshylar, jazda nemese qysta balyq aýlaýdy unatatyndar toılaıdy.
ESTE QALAR OQIǴALAR
1906 jyly Reseıdiń Vyborg qalasynda birinshi Memlekettik Dýmanyń taratylýyn zańsyz dep tanyǵan depýtattar halyqqa úndeý joldady. Bul úndeý tarıhta Vyborg úndeýi degen atpen qalǵan. Dýmany taratý týraly patsha jarlyǵyna qarsy halyqty salyq tóleýden, áskerı mindetkerlikti óteýden bas tartyp, narazylyq bildirýge shaqyrǵan bul úndeýge qol qoıǵan 200-ge jýyq depýtattyń basym kópshiligi kadet partııasynyń ókilderi boldy. Olardyń qatarynda Álıhan Bókeıhan men Sálimgereı Jantórın de boldy. 1907 jyly jeltoqsanda úndeýge qol qoıýshylar sotqa tartylyp, olardyń ishinde 167 adam 3 aı merzimge abaqtyǵa jabylyp, endigi jerde Dýmaǵa múshe bolý quqyǵynan aıyryldy.
1991 jyly QR Prezıdentiniń Jarlyǵymen Qazaqstanda Memlekettik salyq qyzmeti quryldy.
2001 jyly Qazaqstan Respýblıkasynyń «Ǵylym týraly» QR Zańy jaryq kórdi.
2007 jyly Atyraý memlekettik ýnıversıteti janyndaǵy arheologııalyq-etnografııalyq ortalyqtyń kezekti ekspedıtsııasynyń músheleri sarmat dáýirinen jetken alty obany tapty. Sarmat dáýirine qatysty birneshe kóne qumyra, ejelgi halyqtyń basqa da tutynǵan ydys-aıaqtary Atyraý oblysynyń Qyzylqoǵa aýdanynan tabyldy.
2009 jyly «Qazposhta» AQ Qazaqstan Respýblıkasynyń aýmaǵynda «Ejelgi Qazaqstandaǵy qarýlar men qarý-jaraqtar» toptamasynyń kórkemdik markasyn aınalymǵa engizdi. Markada XVIII ǵasyrdaǵy batyrdyń qalqany bir top jaýyngerdiń beınesinde beınelengen. Marka tórt boıaýda ofset, burǵylap tesý ádisi boıynsha oryndalǵan, ólshemi – 50h38 mm, taralymy – 30 myń dana. Sýretshisi – Danııar Muhamedjanov. Markalar Beıjińniń (QHR) poshtalyq tańbalar fabrıkasynda basyp shyǵarylǵan.
2011 jyly Ońtústik Qazaqstan oblysy arqyly «Azııa turǵyndaryna taza sý úshin» uranymen halyqaralyq marafon marshrýty ótti. Úsh adam 150 kúnniń ishinde alty memlekettiń aýmaǵyn kesip ótti.
2015 jyly alǵash ret qazaqstandyq tóreshi Birlesken kúres áleminiń (United World Wrestling – UWW) sýpervaızeri boldy. Grek-rım, erkin jáne áıelder kúresi boıynsha referı Baqytjan Jaqsyqulov Frankfýrttaǵy (Germanııa) tóreshiler semınaryna qatysty. Onyń qorytyndysy boıynsha UWW prezıdenti Nenad Lalovıch qazaqstandyqty sýpervaızer etip taǵaıyndady.
2017 jyly Úndistannyń Bhýbaneshvare qalasynda ótken Azııa chempıonatynda qazaqstandyq jeńil atletter eki altyn jáne bir kúmis medal aldy.
2018 jyly Bolgarııada KWU Camp 2018 halyqaralyq jazǵy lager aıasynda kıokýshınkaı-kan karateden «Varna Cup 2018» dástúrli kadetter týrnıri ótti. Onda Aqmola oblystyq mamandandyrylǵan balalar-jasóspirimder sport mektebiniń tárbıelenýshisi Álemgúl Sabyrhan 65 keliden astam salmaq dárejesinde jeńimpaz atandy.
2019 jyly 9 jastaǵy mektep oqýshysy Láılim-Shyraq qazaqtyń uly aqyny Abaıdyń óleńinen úzindi oqyp, QR Prezıdenti Qasym-Jomart Toqaevqa estafeta joldady.
«Kishkentaı baldyrǵan qyzymyz Láılim-Shyraq Abaıdyń 175 jyldyǵyna oraı uly aqynnyń óleńderinen úzindi oqý estafetasyn maǵan joldaǵan eken. Men bul bastamany zor qýanyshpen qabyldadym. Hakim Abaıdyń esimi árqashan qazaq halqymen qatar aıtylady. Biz Abaıdy ulyqtaý arqyly jas urpaqtyń boıyna ulttyq rýh darytamyz. Abaı arqyly elimizdi álemge pash etemiz. Bıyl 30 mamyrda danyshpan Abaıdyń 175 jyldyǵyn respýblıkalyq deńgeıde atap ótý jóninde arnaıy Jarlyqqa qol qoıdym. Abaı murasy – bizdiń qasterli qazynamyz», – dep atap ótti Qasym-Jomart Toqaev.
Memleket basshysy kemeńger aqynnyń jastardy bilim men ǵylymǵa shaqyratyn, maqsatyńa jetý jolynda qajet asyl qasıetterdi atap kórsetken «Ǵylym tappaı maqtanba» atty óleńinen úzindi oqyp berdi.
Keıinnen bul estafeta Qazaqstandaǵy jáne shet elderegi qalyń kópshiliktiń qoldaýyna ıe boldy.
2022 jyly Qazaqstannyń birinshi raketkasy Elena Rybakına Ýımbldon týrnıriniń jeńimpazy atandy. 9 shildede Týnıs ókili, WTA Ons Gıll reıtınginde álemniń ekinshi raketkasymen ótken fınaldyq matchta qazaqstandyq tennısshi (WTA álemdik reıtınginde 23-oryn) 3:6, 6:2, 6:2 esebimen jeńiske jetti. Kezdesý 1 saǵat 50 mınýtqa sozyldy.
