9 qarasha. Jylnama
Kazinform oqyrman nazaryna 9 qarashaǵa arnalǵan ataýly kúnder men este qalar oqıǵalar kúntizbesin usynady.
ATAÝLY KÚNDER
Halyqaralyq fashızmge, násilshildikke jáne antısemıtızmge qarsylyq kúni
1938 jylǵy qarashanyń 9-ynan 10-yna qaraǵan túni Germanııada «Hrýstal túni» bolǵan. Bul túni júzdegen evreıdi óltirip, taǵy 30 myńdaı adamdy kontslagerge jóneltti. Ataýly data osy qaraly kúndi eske alý úshin bekitilgen.
Halyqaralyq ıadrolyq qarýǵa qarsy aktsııa kúni
Bul kúni ıadrolyq energetıkany damytýǵa qarsy jáne onyń qaýiptiligin arttyrǵany úshin narazylyq aktsııalary, demonstratsııalar ótedi.
ESTE QALAR OQIǴALAR
1945 jyly A.P. Chehov atyndaǵy Pavlodar oblystyq dramalyq teatrynyń negizi qalandy.
1989 jyly Soltústik Qazaqstan oblysy Іshki ister departamentiniń murajaıy alǵashqy kelýshilerdi qabyldady. Mýzeı qorynda tórt myńnan astam jádiger bar: qujattar, marapattar, jeke zattar, fotosýretter, formalar.
2005 jyly Baıqońyr aılaǵynan «Soıýz-FG» zymyran tasyǵyshymen «Venera-Ekspress» eýropalyq ǵarysh apparaty ushyryldy.
2010 jyly Nıý-Iorkte Qazaqstan-Amerıka ınvestıtsııalyq forýmy ótip, onda taıaýda AQSh-ta (Nıý-Iork qalasy) ashylǵan QR saýda-óndiristik palatasy ókildiginiń tusaýkeseri boldy.
2012 jyly batysqazaqstandyq belgili ánshi Marat Sarbópeev Makedonııanyń astanasy Skopede ótken «Evrofest» estradalyq ánder festıvalinen bas júldemen oraldy. Aıta ketetin jaıt, «Evrofest» festıvaline buǵan deıin Qazaqstannan eshkim qatyspaǵan eken.
2015 jyly Almatydaǵy Keńsaı zıratyna Batyrhan Shúkenovke arnalǵan eskertkish qoıyldy. Keshenniń bıiktigi – 2,15 m. Memorıal taqtanyń oń jaǵynda saksofon ustaǵan Batyrhan Shúkenovtiń beınesi beınelengen.
2015 jyly Semeıde jańa kórnekti oryn – «Danalyq qabyrǵasy» paıda boldy. Bul ádetten tys jobaǵa jastar bastamashylyq jasady. Qalanyń ortalyǵyndaǵy kádimgi ǵımarat qabyrǵasy freska jazýlaryna aınaldy. Sýretshiler onda 3D formatynda ulylar: Abaıdyń, Shákárimniń jáne Muhtar Áýezovtiń portretteri beınelendi. Uıymdastyrýshylar kartınany qazaq ǵaryshkerleriniń portretterimen tolyqtyrmaq.
2016 jyly Japonııada resmı saparmen júrgen Qazaqstan Prezıdenti Nursultan Nazarbaevqa Hırosıma qalasynyń «Erekshe qurmetti azamaty» ataǵy berildi.
2016 jyly Qazaqstannyń úsh ulttyq teatryna: koreı, nemis jáne uıǵyr teatrlaryna akademııalyq mártebe berý týraly Prezıdent ókimi shyqty.
2018 jyly Qazaqstan shahmaty tarıhynda tuńǵysh ret Hanty-Mansıısk qalasynda ótken Álem chempıonatynyń 1/8 fınalyna qazaq shahmatshysy Jansaıa Ábdimálik ótti. Hanty-Mansıısktegi álem chempıonaty álemniń 64 myqty shahmatshylaryn jınady. Chempıonat erejeleri qatal boldy. Nokaýt-týrnırler júıesi jeńilis bolǵan jaǵdaıda oıynshylardy tez arada jarystan shyǵaryp jiberdi.
2020 jyly ІІM Qazaqstan tarıhynda alǵash ret «Sert» respýblıkalyq detektıvtik shyǵarmalar konkýrsyn uıymdastyrdy. Baıqaýdyń maqsaty – halyqtyń quqyqtyq sanasy men quqyqtyq mádenıetin, sondaı-aq qazaqstandyq patrıotızmdi arttyrý, Іshki ister organdarynyń qyzmetkerlerin Otanǵa qaltqysyz qyzmet etýge, ant pen qyzmettik paryzǵa adal bolýǵa tárbıeleý.
2021 jyly Kókshetaýda TopIQ elektrondy oqýlyqtarynyń alǵashqy ulttyq platformasynyń tusaýkeseri ótti.
Platforma, bir jaǵynan, yńǵaıly ádisteme retinde muǵalimderdiń jumysyn jeńildetip, oqýshylardyń bilimge, pánge degen qyzyǵýshylyǵy men yntasyn arttyrady. Fotosýretter, beıneler, aýdıo jáne qyzyqty ınteraktıvti áreketter sııaqty mýltımedııalyq materıaldar stýdentterge ózdiginen bilim alýǵa múmkindik beredi. Bul balalarynyń bilimin baqylaıtyn ata-analar úshin de tıimdi.
2022 jyly Astanadaǵy «Pekın Palas Soluxe Hotel Astana» qonaq úıinde Qazaqstan men QHR arasyndaǵy dıplomatııalyq qarym-qatynastyń 30 jyldyǵyna arnalǵan «Qazaqstan-Qytaı: tatý kórshilik jáne ózara tıimdi yntymaqtastyqtyń úsh onjyldyǵy» atty mereıtoılyq kitaptyń tusaýkeseri ótti.
2023 jyly Reseı prezıdenti Vladımır Pýtın Astanaǵa resmı saparmen ushyp kelip, Qazaqstan men Reseı arasyndaǵy HІH óńiraralyq yntymaqtastyq forýmyna qatysty. Sondaı-aq Qazaqstan men Reseı basshylary tar jáne keńeıtilgen quramda kelissózder júrgizip, onda qazaqstandyq-reseılik áriptestik máseleleri talqylandy.
2023 jyly sadaq atýdan Qazaqstan quramasynyń múshesi Andreı Tıýtıýn Bangkok qalasynda (Taıland) ótken Azııa chempıonatynda altyn medal jeńip aldy. Aqmola oblysynyń 17 jasar sadaqshysy aqtyq oq atýda Ońtústik Koreıa ókili Kım Djonhodan basym tústi. Olar qurama sadaq baǵdarlamasynda baq synady, sońǵy talpynysta sáttilik qazaqstandyqtar jaǵynda boldy. Andreı aýa-raıynyń qolaısyzdyǵyna qaramastan dál túsirip, Azııa chempıonatynda altyn aldy.
