9 aıda óńdeý ónerkásibi 6,2 paıyzǵa artty – Ersaıyn Naǵaspaev

ASTANA. KAZINFORM — Bıyl Qostanaı qalasynda KIA jeńil avtomobılderin óndiretin zaýyt iske qosylady. Bul týraly búgin Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.

- Toǵyz aıdyń qorytyndysynda óńdeý ónerkásibiniń negizgi salalarynda oń dınamıka baıqalyp, ósim 6,2 paıyzdy qurady. Metallýrgııa, mashına jasaý, hımııa, qurylys materıaldar óndirisi, jeńil ónerkásip jáne óńdeý ónerkásibiniń taǵy 11 salasynda kórsetkish artýda. Metallýrgııa ónerkásibinde kólem 0,3 paıyzǵa artty, - dedi ol.

Mınıstrdiń aıtýynsha, oń dınamıka otandyq kásiporyndardyń júktemesin arttyrý, shıkizatpen qamtamasyz etý nátıjesinen qalyptasyp otyr.

- Mashına jasaý salasy kólik quraldary, aýyl sharýashylyq tehnıkasy, jáne túrli jabdyqtar óndirisiniń ósýinen 14 paıyzǵa ulǵaıdy. Bul – ishki suranystyń ulǵaıýy, iri ınvestıtsııalyq jobalardyń júzege asyrylýy men memlekettik qoldaýdyń nátıjesi. Sonymen qatar bıyl Almaty qalasynda kópbrendti jeńil avtomobıl shyǵaratyn zaýyt, Astana qalasynda jolaýshylar vagondaryn óndiretin «Shtadler Qazaqstan» kásiporny, Atyraý qalasynda júk vagondaryn shyǵaratyn zaýyt paıdalanýǵa berildi. Sondaı-aq Qostanaı qalasynda KIA jeńil avtomobılderin óndiretin zaýytty iske qosý josparlanǵan, - dedi Ersaıyn Naǵaspaev.

Onyń dereginshe, hımııa ónerkásip salasynda polıpropılen, natrıı tsıanıdi, ammıak selıtrasy jáne ammofos óndirý kólemi 9,6 paıyzǵa artty.

- Beton, qurylys qospalary, ák, otqa tózimdi buıymdar, tsement jáne beton konstrýktsııalary óndirisi artyp, qurylys materıaldar óndirisi 4,7 paıyz ulǵaıdy. Jeńil ónerkásipte ósim 9,4 paıyzdy kórsetip otyr, - dedi ol.

Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salyndy.