9 aıda el ekonomıkasy 4,7 paıyzǵa ósti

9 aıda el ekonomıkasynyń ósý qarqyny 4,7 paıyzdy qurady. Bul týraly búgin Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy Kazinform agenttiginiń tilshisi.

«Osy jylǵy qantar-qyrkúıek aılarynyń qorytyndysy boıynsha Qazaqstan ekonomıkasynyń ósý qarqyny 4,7 paıyzdy qurady. Onyń ishinde naqty sektor – 3,7, al qyzmet kórsetý salasy 5,1 paıyzǵa ósti. Salalar arasynda eń joǵary ósýdi qurylys, saýda, sondaı-aq aqparat jáne baılanys kórsetti. Negizgi kapıtalǵa salynǵan ınvestıtsııalardyń ósý qarqyny 12,1 paıyz boldy. Investıtsııalar aǵyny kólik jáne qoımalaýda – 59,4, saýdada – 37,5, bilim berýde – 23,7, aýyl sharýashylyǵynda – 12,9, sondaı-aq ónerkásipte – 8,2, onyń ishinde taý-ken óndirý ónerkásibinde 4,3 paıyzǵa artty», - dedi mınıstr.

Onyń atap ótýinshe, óńirler arasynda eń joǵarǵy ósim Mańǵystaý, Túrkistan, Pavlodar jáne Abaı oblystarynda baıqaldy.

«Aldyn ala qorytyndy boıynsha 2023 jylǵy qańtar-tamyzda syrtqy saýda taýar aınalymy 4,2 paıyzǵa ósip, 91,1 mlrd dollardy qurady. Eksport 51,2 mlrd dollardy qurap, onyń ishinde óńdelgen taýarlar eksporty 16,2 mlrd dollarǵa jetti. Taýarlar ımporty 39,8 mlrd dollardy qurady. Jalpy, oń saýda balansy 11,4 mlrd dollarǵa teń», - dedi Álibek Qýantyrov.