87 jastaǵy mańǵystaýlyq keıýana Dımash Qudaıbergenge erekshe syı jasady

AQTAÝ. KAZINFORM – Mańǵystaýlyq 87 jastaǵy qolóner sheberi Sharhat Tólemisova Dımash Qudaıbergenge arnap jasaǵan shashaǵyn tabystaý úshin «Aqtaý – Túrki áleminiń mádenı astanasy» merekelik sharasynyń ashylý saltanatyna arnaıy kelip, 2 kún boıy qatysqan. 

90 jasqa taıaǵan keıýana Qazaqstannyń jaryq juldyzy Dımashqa arnap shashaq jasap, ony óz qolymen tabystaǵysy keletinin aıtqan edi. 

– Dımash Aqtaýǵa keledi degendi estigen soń, «nege bir tal shashaq baılamasqa?» dep oıladym. Sondyqtan kezdesip, dombyrasyna óz qolymmen taǵýdy jón sanadym, - dedi qart ana.

Dımash Qudaıbergen búgin aq tileýli anamen arnaıy kezdesip, ózine arnaǵan shashaqty aldy.

Buǵan deıin Aqtaýda «Aqtaý – Túrki áleminiń mádenı astanasy» jylynyń ashylý saltanatynda kórermender Dımash Qudaıbergendi erekshe yqylaspen qarsy alǵany týraly jazǵan bolatynbyz. 

Aqtaýda ótken gala kontsertke 100 myńǵa jýyq kórermen jınaldy.