8 jasar bala Astana úshin 20 ıdeıa usyndy
«Elorda turǵyndary arasynda «Astananyń 20 qyry» atty konkýrs ótkizdik. Oǵan 3 myńnan astam adam qatysty. Búgin Amfıteatrda jeńimpazdar marapattalady», - dep jazdy Astana ákimi óziniń Feısbýktegi paraqshasynda.
Saltanatty marapattaý rásimi myna nomınatsııalar boıynsha júrgiziledi: «Sporttan da artyq!», «Elordanyń úzdik selfıi», «Astanaǵa arnaý», «Astana boıaýlary», «Elordadaǵy tanymal nysandardyń aldynda sándi úlgidegi úzdik streetstyle sýret», «Elordaǵa úzdik syılyq», «Welcome to Astana», «Astana Public Art», «Elorda beıneleri», «Tátti Astana», «Astanany jaqsarta tús!».
Marapattaý rásiminen keıin estrada juldyzdarynyń qatysýymen merekelik kontsert ótedi.
Konkýrs qorytyndysy boıynsha qalalyq «ıdeıalar banki» baıqaýǵa qatysýshylar engizgen jańa usynystar men ıdeıalarmen tolyqty: «Astana Public Art», «Astanany jaqsarta tús!»
Elordanyń mereıtoıyna 8 jasar konkýrsqa qatysýshy 20 ıdeıa usyndy! Budan bólek, konkýrsqa qatysqan barlyq sýretterden lomoqabyrǵa jasaldy. Sondaı-aq, qala fotograftary elordaǵa arnaıy syılyq retinde Astananyń jańa kórinisterinen fotokitap tartý etti.
Ákimdiktiń saıtynda habarlanǵandaı, bul konkýrs elorda tarıhyndaǵy eń iri jáne aýqymdy shyǵarmashylyq jarys bolyp otyr. Astanany tek qala turǵyndary ǵana emes, sondaı-aq elimizdiń basqa óńirleri, tipti álemdegi basqa elder de quttyqtaǵan. Saraptama komıssııasyna 3000 ótinish túsken. Kópshiliktiń suraýymen, birqatar nomınatsııalarǵa jumystardy qabyldaý merzimi 31 shildege deıin uzartyldy.
