8 shilde. Jylnama
Kazinform oqyrman nazaryna 8 shildege arnalǵan ataýly kúnder men este qalar oqıǵalar kúntizbesin usynady.
Dúnıejúzilik allergııamen kúres kúni
2005 jyldan bastap Dúnıejúzilik allergııa uıymynyń (World Allergy Organization, WAO) jáne Dúnıejúzilik ımmýnopatologııa uıymynyń (World Immunopathology Organization, WIPO) sheshimi boıynsha jyl saıyn atap ótiledi.
Onyń maqsaty – Jer betinde jıi kezdesetin aýrýdyń belgileri men aldyn-alý sharalary týraly kópshilikke habarlaý. Dúnıejúzilik densaýlyq saqtaý uıymynyń statıstıkasyna sáıkes, álem halqynyń shamamen 40% allergııadan zardap shegedi.
ESTE QALAR OQIǴALAR
1994 jyly Aqmola oblysynyń Býrabaı kýrort aımaǵynda Abylaı han eskertkishiniń ashylý saltanaty ótti.
2009 jyly Ulttyq banktiń Astanadaǵy ortalyq fılıalyna «OLYMPIC GAMES 2010», «Ejelgi qorǵan qazynalary. Berel qorǵany» serııasynan - «Jyrtqysh pen buǵy» jáne «Jalaýly kómbesi» kollektsııalyq shaqalary kelip tústi.
«Jalaýly kómbesi» shaqalary 999/1000 synamaly, «proof» sapaly altynnan jasalǵan, salmaqtary 0,5 jáne 1,24 gramm. Olardyń ishindegi úlkeniniń quny - 8500 teńge, kishisiniń quny - 4500 teńge. «Jyrtqysh pen buǵy» shaqasy da osy synamadan jasalǵan, quny da osyndaı. «OLYMPIC GAMES 2010» shaqasy 925 synamaly kúmisten jasalǵan, salmaǵy - 31,1 gramm, dıametri - 38,61 mm.
2009 jyly Pavlodar oblysynyń Aqsý qalasynda saltanatty jaǵdaıda Qazaqstan Ǵylym Akademııasynyń tuńǵysh prezıdenti Qanysh Sátbaevqa eskertkish ashyldy. Ǵalymnyń músini qalanyń bas kóshesine ornatyldy. Eskertkish avtory pavlodarlyq músinshi Igor Sobolev músindik portrette ataqty jerlesin barynsha shynaıy kórsetýge tyrysqan.
2010 jyly Almatyda QR Ortalyq memlekettik muraǵatyna resmı túrde qazaqtyń saıası qaıratkeri Mustafa Shoqaıdyń qoljazbalary tapsyryldy. Qoljazbalardy Túrkııadaǵy TÚRKSOI Halyqaralyq túrik mádenıeti uıymynyń ókilderi tapqan.
2010 jyly Aqtóbedegi lokomotıv paıdalaný deposynda mashınıske qoıylǵan sımvoldyq eskertkish ashyldy. Jalpy bıiktigi úsh metrden astam bolatyn qurylymdy eskertkish ylǵı da qurmetpen kıiletin mashınıstiń formasyn beınelegen.
Onyń qolyna ózimen birge poıyzda alyp júretin mashınıstiń jeke zattary men azyq-túlik salynǵan jol sómkesi ustatylǵan. Eskertkish temir betonmen jasalyp, qolamen qaptalǵan. Eskertkish ornatý týraly oı Aqtóbe lokomotıvti deposynda ujymnyń, quqyq odaǵy men Ardagerler keńesi músheleriniń qatysýymen ótken bir jıynda aıtylǵan. Bul eskertkishtiń Aqtóbede ornalasýy jaıdan-jaı emes, dál osy jerden temir jol kóliginiń tarıhy bastalǵan desek bolady.
2011 jyly QR Ulttyq banki Qazaqstan táýelsizdiginiń 20 jyldyǵyna arnalǵan eskertkish banknotasyn shyǵardy. Túsi: negizinen kók-kúlgin.
Aldyńǵy jaǵynda Qazaqstan Respýblıkasynyń Memlekettik rámizderi, «Qazaq Eli» monýmenti beınelengen. Artqy jaǵynda Qazaqstan Respýblıkasy Prezıdentiniń rezıdentsııasy - Aqordanyń keskini túsirilgen.
2015 jyly Magdebýrgte (Germanııa) ótken ІІ Eýropalyq hor oıyndarynda TÚRKSOI Jastardyń kameralyq hory «Rýhanı mýzyka» atalymy boıynsha altyn medaldi jeńip aldy.
Hordyń jetekshisi hormeıster, Astana Memlekettik fılarmonııasynyń Kameralyq horynyń kórkemdik jetekshisi Gúlmıra Quttyqadamova. Baıqaý barysynda Túrik mádenıeti halyqaralyq uıymynyń Jastar hory Motsart, Antonıo Lottı, ıÝzef Svıderdiń shyǵarmalary men áıgili qazaq kompozıtory Erkeǵalı Rahmadıevtyń «Horal» týyndylaryn oryndady. Qazaqstannyń túrki áleminiń shyǵarmashylyq ujymynda «Astana Opera» men Astana qalasynyń Memlekettik fılarmonııasynyń ártisteri bar. TÚRKSOI Jastar hory Ázerbaıjan, Qazaqstan, Qyrǵyzstan, Túrkııa, Tatarstan konservatorııalarynyń stýdentterinen qurylǵan.
Hordy qurý sheshimi Qazan qalasynda ótken TÚRKSOI-dyń Mádenıet mınıstrleriniń Turaqty keńesiniń 32-shi májilisinde qabyldandy.
2017 jyly 6 jasar aqtaýlyq Aıanat Dáýletalına Bolgarııada ótken Prince&Princess of the World halyqaralyq festıvaliniń gran-prı júldesin jeńip aldy. Konkýrsqa álemniń 20 elinen 50 ónerpaz qatysqan bolatyn. Festıvalmen qatar ótken Star of the world-2017 baıqaýynda Aıanat bir án aıtyp, eki bı bılep, úsh altyn medal ıelendi.
2021 jyly Jambyl oblysynyń Sarysý aýdanynda Jańatas jel elektr stantsııasy iske qosyldy. Joba aıasynda 40 jel energetıkalyq blok salyndy, qýaty 2,5 megavatt elektr jabdyǵy, sondaı-aq stantsııalyq torap pen kópfýnktsıonaldy ortalyq ornatyldy.
«Bul jel elektr stantsııasy Orta Azııadaǵy elektr qýatyn óndiretin eń iri stantsııa bolady. Ony aýdan jáne oblys turǵyndary paıdalanady», - dedi saltanatty ashylý barysynda Jambyl oblysy ákiminiń orynbasary Almas Mádıev.
2021 jyly Qazaqstan Respýblıkasy seriktes organ mártebesimen Eýropalyq standarttaý uıymdary: CEN Eýropalyq standarttaý komıteti jáne CENELEC eýropalyq elektrotehnıkalyq komıteti Bas Assambleıasynyń 11-shi jalpy sessııasynyń jumysyna qatysty.
Bizdiń el seriktes organ retinde CEN jáne CENELEC-te 2014 jyldyń 1 maýsymynan bastap usynylǵan. Eýropalyq standarttardy ázirleý boıynsha Eýropalyq odaq ýákiletti organ retinde resmı tanylǵan uıymdarmen seriktestiktiń elimiz úshin strategııalyq mańyzy zor.
2023 jyly Astana kúnin merekeleý aıasynda elordalyq saıabaqta kóshe taǵamdarynyń festıvali ótti. Elorda ákimdiginiń qoldaýymen uıymdastyrylǵan jaz men dám merekesine Astananyń 10 meıramhanasy qatysty. Festıvaldiń basty qonaqtary balalar boldy. Merekenii basty taǵamy retinde qazaqtyń dástúrli baýyrsaǵy biraýyzdan tańdaldy. Festıvalde baýyrsaqtardyń túrleri men pishinderi kóp boldy - dóńgelek, tórtburyshty, úshburyshty, shokolad pastasy men banan salynǵan, irimshik jáne taýyq eti nemese sábiz qosylǵan.
