8 qańtarda eldegi qaı joldarda qozǵalys tártibi ózgerdi

ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, 2025 jylǵy 8 qańtar saǵat 08:00-degi jaǵdaı boıynsha Shyǵys Qazaqstan oblysynda respýblıkalyq mańyzy bar «Óskemen – Rıdder – RF shekarasy» avtojolynyń 15-105-shaqyrym aralyǵynda (Beloýsovka kenti – Rıdder qalasy ýchaskesi) avtokóliktiń barlyq túri úshin qozǵalys ashyldy.

Sondaı-aq Aqmola oblysynda respýblıkalyq mańyzy bar «KAZ02 Astana – Kókshetaý (aınalma jol) – Petropavl – RF shekarasy (Jańa Jol ótkizý beketi)» avtojolynyń 18-232-shaqyrym aralyǵynda barlyq kólik túri úshin jyldamdyq shekteýi 90 shaq/saǵ-tan 110 shaq/saǵ-qa ózgertildi.

Jabyq joldar

Shyǵys Qazaqstan oblysynda tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde qys aıaqtalǵansha saqtalady.

Sonymen birge «Astana – Shiderti – Pavlodar – Ýspenka – RF shekarasy» avtojolyndaǵy jolaıryqtyń kópir qurylymynyń shetki arqalyqtary zaqymdanýyna baılanysty «Qalqaman» jolaıryǵy ýchaskesi jabyldy. Atap aıtqanda, Qalqaman kentine kireberis pen Astana baǵytyna shyǵatyn jol ýaqytsha jabyq.

Eske salaıyq, buǵan deıin sınoptıkter 8 qańtarda Qazaqstannyń 15 oblysynda jáne Astanada aýa raıynyń qolaısyzdyǵyna baılanysty eskertý jasady.