8 qańtar. QazAqparat kúntizbesi
ESTE QALAR OQIǴALAR
1864 jyly Torǵaı dalasynda qazaq balalaryna arnalǵan alǵashqy mektep ashyldy. Ybyraı Altynsarın osy oqıǵaǵa baılanysty qýanyshyn N. Ilmınskııge jazǵan hatynda bólisti.
1963 jyly 8-9 qańtarda Qazaqstan Kınematografıster odaǵynyń birinshi quryltaı sezi ótti. Onda osy odaqtyń birinshi hatshysy bolyp Sháken Kenjetaıuly Aımanov saılandy.
1992 jyly Jezqazǵanda tuńǵysh qazaq ǵaryshkeri Toqtar Áýbákirov atyndaǵy oqýshylar saraıy ashyldy.
1997 jyly Jambyl qalasynyń aty Taraz bolyp ózgertildi. Bizdiń dáýirimizge deıingi І ǵasyrdyń ortasynda Qytaı derekterinde saqtalǵan qalanyń tarıhı ataýy qaıtaryldy.
2007 jyly Parıjde Mustafa Shoqaı atyndaǵy qazaq-frantsýz dostyǵynyń qoǵamy ashyldy. Mustafa Shoqaı (1889-1941) – ótken júz jyldyqtyń birinshi jartysyndaǵy ulttyq tarıhtyń tanymal qoǵam jáne saıası qaıratkeri, Orta Azııanyń bostandyǵy men táýelsizdigi úshin kúresken pýblıtsıst, ıdeolog, «Alash Orda» partııasy jetekshileriniń biri.
2014 jyly Astana qalasyndaǵy №2 mýzyka mektebiniń qazaq halyq aspaptary ansamblindegi jas dombyrashylar Qytaıda ótken halyqaralyq «Beıjiń juldyzdary» baıqaýynda 1-oryndy ıelendi. Halyqaralyq baıqaýǵa Qazaqstan, Qytaı, Reseı men Mońǵolııadan 40-qa jýyq ansambl qatysqan bolatyn.
2016 jyly álemdegi eń iri ınternet-dúkenderdiń biri «Amazon» QR Prezıdentiniń 2012-2015 jyldar arasynda sóılegen sózderiniń «Leadership Perspectives» atty aǵylshyn tilinde jarııalanǵan jınaǵyn satylymǵa shyǵardy.
2018 jyly Abý-Dabıde qazaqstandyq mánerlep syrǵanaýshylar FBMA Trophy mánerlep syrǵanaýdan І halyqaralyq týrnırde 4 medal jeńip aldy: eki qola, bir kúmis jáne bir altyn. Eń jaqsy nátıjeni Nıkıta Manko kórsetti. Astanalyq mánerlep syrǵanaýshy erkin jáne qysqa baǵdarlamalarda óner kórsetý boıynsha 139.30 ball nátıjesimen jasóspirimder arasynda úzdik atandy.
2019 jyly Halyqaralyq shahmat federatsııasy (FIDE) komıssııasynyń quramyna tuńǵysh ret Qazaqstannyń 6 ókili endi. Atalǵan tizim búkilálemdik shahmat federatsııasynyń 3 jyl saıyn ótetin prezıdenttik keńesinde bekitiledi. FIDE komıssııasynyń quramyna álemniń 130 memleketinen 224 adam endi.
2019 jyly aqtóbelik dárigerler 1 saǵat ishinde 4 myńnan (4 270) astam adamnyń qan qysymyn ólshedi. Barlyǵy 500 dáriger Gınnestiń rekordyn resmı túrde jańartty. Buǵan deıingi rekord Úndistanda 2015 jyly tirkelgen, onda dárigerler bir saǵatta 3 600 adamnyń qan qysymyn ólshedi.
2019 jyly Egıpet Arab Respýblıkasyndaǵy QR Elshiliginiń qoldaýymen ál-Farabı atyndaǵy Qazaq ulttyq ýnıversıteti Kaır ýnıversıtetinde ál-Farabı ǵylym-bilim ortalyǵyn ashty.
2020 jyly Qazaqstan 2020-2021 jyldar kezeńine teńizge shyǵa almaıtyn damýshy elder tobyna (TShJK) tóraǵalyq etetin boldy. Tóraǵalyqty tapsyrý rásimi BUU-nyń Nıý-Iorktegi shtab-páterinde BUU janyndaǵy topqa múshe memleketterdiń elshileri men sarapshylarynyń jáne az damyǵan elder, teńizge shyǵa almaıtyn damýshy elder jáne shaǵyn araldyq damýshy memleketter máseleleri boıynsha BUU-nyń joǵary ókiliniń qatysýymen ótti.
2021 jyly Qazaqstanda «Túrki álemi: tarıhı-mádenı atlas» atty irgeli ǵylymı eńbek jaryq kórdi. Onda Ptolomeı kartasynan bastap, odan keıingi túrki áleminiń kóne dáýirden qazirgi zamanǵa deıingi kartalary usynylǵan.
Geografııalyq karta keń keńistikter men tarıhı panoramalardy elestetýge múmkindik beredi. Sondyqtan, túrki halyqtary arasynda árqashan qasıetti uǵym bolǵan ulttyq biregeılikti, tolyq jáne kóp qyrly Otan týraly ıdeıany qalyptastyrýdyń qýatty quraly bolyp tabylady. Bul tarıhı-mádenı atlas osy maqsatta shyǵaryldy.
2021 jyly Qazaqstanda Balyq sharýashylyǵy komıteti quryldy, onyń aldynda baǵdarlamany iske asyrýǵa memlekettik qoldaýdyń qoldanystaǵy sharalaryn keńeıtý, zańnamany jetildirý, balyq jemi óndirisin jolǵa qoıý, kadrlarmen qamtamasyz etý mindetteri tur.
2022 jyly Memleket basshysy Qasym-Jomart Toqaev elimizdiń birqatar óńirinde bolǵan qaıǵyly oqıǵalardyń saldarynan adamdardyń qaza tabýyna baılanysty 10 qańtardy jalpyulttyq aza tutý kúni dep jarııalaý jóninde qujatqa qol qoıdy.
