7,5 mıllıon adam aýylda turady – Prezıdent

ASTANA. KAZINFORM — Bul týraly Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda aıtty. 

Sońǵy on jylda aýyl sharýashylyǵynyń jalpy ónimi 2,5 eseden astam ósti.

— Qazir halqymyzdyń 37 paıyzy, ıaǵnı 7,5 mıllıon adam aýylda turady. Aýyl — halqymyzdyń tamyry, rýhanı qazyǵy. Buryn solaı bolǵan, bolashaqta da solaı bolyp qala bermek.

Túptep kelgende, aýyl sharýashylyǵyn damytý máselesine jalpy aýyl-aımaqtardy, ıaǵnı búkil eldi damytý dep qaraǵan jón. Osy baǵytta biz sońǵy jyldary aýqymdy reformalar júrgizip jatyrmyz, — dedi ol.

Elimizdiń negizgi kórsetkishteri turaqty. Bıylǵy on aıda ekonomıkamyz 6,4 paıyzǵa ósti.

Sonyń ishinde aýyl sharýashylyǵy da qarqyndy damyp jatyr. Jyl basynan beri osy saladaǵy negizgi kapıtalǵa salynǵan ınvestıtsııa 20 paıyzdan astam ósip, 790 mıllıard teńgege jetti.

— Al eńbek ónimdiligi úsh jylda 37,3 paıyzǵa artty. Qazaqstan jahandyq azyq-túlik qaýipsizdigi reıtıngi boıynsha (Global Food Security Index) 32-shi orynda tur. Bul — jaqsy kórsetkish. Biraq bul máz bolyp, qol qýsyryp otyrýǵa bolady degen sóz emes.

Sebebi ashyǵyn aıtýymyz kerek, biz aýyl sharýashylyǵynyń orasan zor áleýetin áli de tolyq qoldanbaı otyrmyz. Elimiz jaıylymdyq jer aýmaǵy boıynsha álemde 6-shy oryn alady. Al egis alqaby boıynsha 8-shi orynda tur. Demek qolymyzda qajetti resýrs bar, tek sony tıimdi paıdalanýymyz qajet.

Sońǵy on jylda aýyl sharýashylyǵynyń jalpy ónimi 2,5 eseden astam ósti, ıaǵnı 3,3 trıllıon teńgeden 8,3 trıllıon teńgege deıin kóbeıdi. 2030 jylǵa deıin bul kórsetkishti taǵy 2 ese arttyrýymyz kerek. Bul — bizdiń qolymyzdan keletin sharýa.

Ulttyq damý josparymyz bar, maqsat-mindetterimiz de — aıqyn. Bizge keregi — sapaly jumys pen naqty nátıje. Sol sebepti aldymen aýyl sharýashylyǵyn damytý úshin erekshe nazar aýdaratyn ózekti máselelerge toqtalyp ótkim keledi, — dedi Memleket basshysy. 

Buǵan deıin Prezıdent aýyl sharýashylyǵy eńbekkerlerine rızashylyǵyn bildirgen edi.