70 jastan keıin zeınetke shyqqan japondardyń zeınetaqysy artady

ASTANA. QazAqparat - Halqy eń uzaq ómir súretin Japonııa eli zeınetaqy reformasyn jasaýdy josparlap otyr. Premer-mınıstr Sındzo Abe japondyqtarǵa zeınetke 70 jastan keıin shyǵýǵa usynys bildirip, onyń ornyna tólemaqynyń kólemi artatynyn jetkizdi, dep habarlaıdy QazAqparat BBC-ge silteme jasap.

Álemniń damyǵan memleketteriniń kópshiligi zeınetke shyǵý jasyn 65 jastan asyrýǵa qyzyǵýshylyq tanytyp otyr. Al Japonııa halqynyń demografııasy men ulttyq minezindegi erekshelikter bul jarysta basyp ozýǵa májbúrleıdi.

Sındzo Abe 6 jyldan beri úkimetti basqaryp keledi jáne qyrkúıek aıynda taǵy da 3 jyldyq mandatty alýy múmkin. Abe aldyńǵy qatarly Nikkei japon gazetine bergen suhbatynda bul merzimdi áleýmettik salany reformalaýǵa jáne eldiń basty problemasy - demografııalyq máseleni sheshýge arnaǵysy keletinin aıtty.

Abe basqarǵan ýaqyt aralyǵynda Japonııa halqynyń jyldam qartaıýy men azaıýyna qaramastan, el ekonomıkasy 8 paıyzǵa ósken. Bul zeınetkerlerdi ekonomıkaǵa aralasýǵa tartýmen baılanysty bolýy múmkin. Mysaly, 2012 jyly 65 jastan asqan azamattardyń 20 paıyzy ǵana eńbek etse, qazir bul kórsetkish 23,5 paıyzǵa deıin kóterilgen.

Premer-mınıstrdiń aıtýynsha, bul úrdisti bekitip, ary qaraı damytý kerek. Úkimet basshysy ol úshin japondyqtarǵa zeınetaqy tólemderinen 70 jastan keıin de bas tartýǵa ruqsat berip, bul mejeden asqan soń kóbirek aqsha alýǵa múmkindik jasaý kerek degen oıda.