7 protsenttik ıpoteka qaı kezde beriledi

ASTANA. QazAqparat - Qazirgi kezde memlekettik organdar men bankter «7-20-25» baǵdarlamasyn pysyqtap jatyr. Degenmen, Ulttyq bank arzan ıpotekany berý merzimin belgilep qoıdy, dep habarlaıdy QazAqparat tilshisi.

«7 protsenttik ıpotekany berý jumystary shamamen jyldyń ortasynda bastalady. Maýsym aıynyń aıaǵyna deıin barlyq quqyqtyq-uıymdastyrýshylyq sharalaryn aıaqtaımyz degen jospar bar. Sodan shilde-tamyz aılarynda bankter arzan ıpotekany berýdi bastaıdy», - dedi Ulttyq bank tóraǵasynyń orynbasary Oleg Smolıakov QazAqparat tilshisine bergen suxbatynda.

Onyń aıtýynsha, jańa baǵdarlama aıasynda jańadan qurylatyn kompanııa bankterden ıpotekalyq nesıelerdi satyp alady da, jyldyq mólsherlemeni 7 protsentke deıin túsiredi. Al nesıeni alǵan azamatttar barlyq tólemderin bankke jasaı beredi.

«Ipotekalyq nesıelerdiń alǵashqy pýly jasalǵan boıda biz onyń barlyǵyn satyp alýǵa kirisemiz. Árıne, ár adamnyń tólem qabilettiligine basa nazar aýdarylady. Endi, memlekettik baǵdaralamalarda áskerıler, áleýmettik jaǵynan az qamtylǵan azamattar jáne taǵy basqa sanattar bar. Jańa baǵdarlamada ondaı kategorııalar bolmaıdy. Biz barlyq zaemdarmen jumys isteıtin bolamyz», - dep atap kórsetti O.Smolıakov.

Bas bankırdiń orynbasary «7-20-25» baǵdarlamasy aıasynda qurylatyn jańa kompanııa men «Nurly jerde» otyrǵan Qazaqstannyń ıpotekalyq kompanııasynyń aıyrmashylyǵyn da jetkizdi. Onyń aıtýynsha, QIK ıpotekalyq zaemdardy sýbsıdııalaıdy. Al jańa qurylatyn kompanııa ol nesıelerdi satyp alatyn bolady.

Aıta keteıik, Úkimettiń búgingi otyrysynda Ulttyq banktiń tóraǵasy Danııar Aqyshev «7-20-25» baǵdarlamasynyń jobasyn tanystyrdy. Bas bankır 7 protsenttik ıpotekanyń basty talabyn da jarııalady.